10—11 сентябрь кунлари Бухорода «Агро Бизнес Бухоро» халқаро форуми бўлиб ўтади. Бу ҳақда Ўзбекистон инвестициялар бўйича давлат қўмитаси «Дарё»га хабар берди. Тадбир қўмита ҳамда Бухоро вилоят ҳокимлиги томонидан ташкил қилинмоқда.
Халқаро форум хорижий ва маҳаллий инвесторлар учун Бухоро вилоятининг инвестицион салоҳиятини намойиш қилиш имкониятини беради, бунда янги «Бухоро-Агро» эркин иқтисодий зонаси томонидан таклиф қилинадиган ҳамкорлик истиқболларига урғу берилади.
Тадбир доирасида кўргазмалар, шунингдек, инвесторлар билан B2B ва B2G форматида бизнес-учрашувлар ўтказилади. Бундан ташқари, форум иштирокчилари билан «Бухоро-Агро» ЭИЗга ташриф уюштирилади.
Эслатиб ўтамиз, Ўзбекистон Президентининг 2018 йил 10 июлдаги «‘Бухоро-агрo’ эркин иқтисодий зонасини ташкил этиш чора-тадбирлари тўғрисида»ги қарори асосида ташкил этиладиган «Бухоро-агро» эркин иқтисодий зонаси ташқи бозорда талаб катта бўлган, юқори қўшилган қийматли рақобатбардош маҳсулотлар етиштиришни таъминлайдиган замонавий иссиқхона хўжаликларини ташкил этишни кўзда тутади.
Изоҳ (0)