«Ўзбекистон» халқаро анжуманлар саройида Ёшлар симфоник оркестри ҳамда Буюк британиялик скрипкачи ва композитор Ванесса Мэйнинг хайрия концерти бўлиб ўтди. Бу ҳақда ЎзА хабар берди.
Дастур ёшлар, санъат, маданият намояндалари, мамлакатда фаолият кўрсатаётган дипломатик корпус ва халқаро ташкилотлар, турли вазирлик, идоралар, жамоатчилик вакиллари эътиборига ҳавола этилди.
— Бу концерт ёшларимиз учун ўзига хос туҳфадир, – дейди Ёшлар симфоник оркестри дирижёри Камолиддин Ўринбоев. – Ўзбекистон ва жаҳон композиторлари асарларидан иборат ушбу дастур томошабинларга манзур бўлди, деб ўйлайман.
Мазкур ижодий жамоанинг жаҳонга машҳур дирижёрлар, мусиқачилар, опера хонандалари билан биргаликда тақдим этган концертларини санъат ихлосмандлари яхши билади. Бу галги концерт Буюк британиялик мусиқачи Ванесса Мэй иштирокида ташкил этилгани Ўзбекистон маданий ҳаётида ўзига хос воқелик бўлди.
Мусиқий кечада жаҳон ва ўзбек композиторлари асарларидан намуналар Ўзбекистон ёшлар симфоник оркестри ҳамда британиялик мусиқачи ижросида янгради. Мухлисларнинг давомли олқиши концертга берилган энг холис баҳо бўлди.
Изоҳ (0)