Пойтахт ҳудудида тадбиркорлик субъектларини қўллаб-қувватлаш, хорижий инвестицияларни кенг жалб қилиш ҳамда давлат ва хусусий шерикчиликни ривожлантириш мақсадида Тошкент шаҳар ҳокимлигида навбатдаги «Очиқ эшиклар куни» ўз ишини бошлади. Бу ҳақда «Дарё»га ҳокимлик матбуот хизмати маълум қилди.
Тадбирнинг биринчи кунида Тошкент шаҳри, Мирзо Улуғбек, Миробод, Яккасарой ва Юнусобод туманларидан келган маҳаллий тадбиркорлар ва хорижий инвесторлар ўз лойиҳалари билан иштирок этди.
Тошкент шаҳар ҳокими вазифасини бажарувчи Жаҳонгир Ортиқхўжаев лойиҳалар билан танишар экан, улар аввало халққа хизмати қилиши, аҳоли розилиги билан амалга ошириш лозимлигини таъкидлади.
Мазкур лойиҳалар ижтимоий соҳа объектлари, хусусан, замонавиймеҳмонхоналар, савдо ва кўнгилочар масканлар, кўп қаватли автотураргоҳлар ҳамда янги уй-жой комплексларини барпо этишни кўзда тутади.
Учрашувда умумий қиймати 5,6 триллион сўм (шундан хорижий сармоялар 625 миллион доллар) бўлган ва 55 790 та янги иш ўринлари яратилиши режалаштирилган 47 та лойиҳа тақдим этилди.
«Очиқ эшиклар куни» 7–8 сентябрь кунларидавом этади, унда пойтахтнинг бошқа туманларидаги инвесторлар иштирок этиш имкониятига эга бўлади.
Изоҳ (0)