Фарғона вилоятидаги «Оила» илмий-амалий тадқиқот марказининг шаҳар ва туман бўлинмаларига Spark автомобиллари топширилди. Бу ҳақда ЎзА хабар берди.
«Оила» марказининг Фарғона вилоят бошқармаси ва ҳудудий бўлинмалари томонидан ёшларни оилавий ҳаётга тайёрлаш, оиладаги низоли ҳолатларни ҳал қилишнинг ҳуқуқий ва психологик асосларини ўргатиш, ажришларнинг олдини олиш борасида бир қатор ишлар амалга оширилди. Соғлом оила қуриш, соғлом фарзандни дунёга келтириш, соғлом турмуш тарзини юритиш асосларини хотин-қизлар орасида манзилли тарғиб этиш мақсадида якка тартибда тушунтириш ишлари, очиқ мулоқот, сайёр қабул ва давра суҳбатлари ўтказилмоқда.
— Оилалар билан алоҳида суҳбатлар олиб бориляпти, сайёр қабуллар уюштирилмоқда. Тушунтириш ва тарғибот ишлари натижасида ўтган 7 ойда ажримлар сони 2017 йилга нисбатан 60 тага камайди, 8 ой давомида 97 та оила яраштирилди. Ҳатто суд қарори билан ажрим масаласи ҳал бўлган Абдураҳимовлар оиласи қайта никоҳдан ўтиш учун ариза топширди. Хотин-қизлар ўртасидаги жиноятчилик тенг ярмига камайди, — дейди «Оила» маркази Қувасой шаҳар бўлинмаси раҳбари Мағфиратхон Ҳасанова.
«Оила» марказлари шаҳар ва туман бўлинмалари фаолиятини қўллаб-қувватлаш, уларга етарли шарт-шароитлар яратиб бериш мақсадида машиналар тақдим этилди.
Изоҳ (0)