Кичик бизнес ва хусусий тадбиркорлик субъектлари экспортини қўллаб-қувватлаш жамғармаси ташаббуси билан Ўзбекистоннинг Малайзиядаги элчихонаси билан ҳамкорликда яна бир лойиҳага қўл урилди. Бу ҳақда жамғарма ахборот хизмати «Дарё»га хабар берди.
Унга кўра, Ўзбекистонда ишлаб чиқарилаётган маҳаллий мева-сабзовот маҳсулотларининг Малайзияга экспортини йўлга қўйиш, ҳамкорликда қўшма корхона ташкил этиш орқали замонавий талаб ва халқаро стандартларга жавоб берадиган маҳсулотлар тайёрлаш мақсадида Барака Иститҳмар компанияси директори Абдуллоҳ Юсуф ва ўзбек тадбиркорлари ўртасида қатор учрашувлар ташкил этилди.
Юқори мартабали меҳмон Ўзбекистонда мева ва сабзавотларни етиштириш уларни сақлаш тизимидаги ўзгаришлар, тайёрланаётган мева-сабзавотларнинг сифати, хусусан, уларнинг табиийлиги ҳамда биокимёвий хусусиятларини алоҳида эътироф этди.
Шунингдек, экспорт қилишда маҳаллий ишлаб чиқарувчиларга кўмаклашадиган ташқи савдо ташкилотларига ҳам яратилган шароитларга алоҳида тўхталиб ўтди. Бу борада Кичик бизнес ва хусусий тадбиркорлик субъектлари экспортини қўллаб-қувватлаш жамғармаси фаолияти муҳим ўрин тутишини таъкидлади. Мазкур учрашувни ташкил қилишда жамғарманинг кўмаги учун миннатдорчилик билдирди.
Ўз навбатида маҳаллий ишлаб чиқарувчилар билан ўзаро савдо ва шериклик алоқаларини мустаҳкамлаш, хусусан мева-сабзовот воситаларини Малайзияга экспорт қилишнинг ташкилий асослари атрофлича муҳокама қилинди. Тадбиркорлар ушбу жараён билан боғлиқ бўлган ўзларини қизиқтирган саволларга атрофлича жавоб олишди.
Шу билан бирга, малайзиялик меҳмон Хоразм вилоятига ҳам таклиф этилди. Унинг ташрифи муносабати билан, қадимий ва бетакрор Хива шаҳрининг тарихий қисми – «Ичан қалъа»да маҳаллий ишлаб чиқарувчилар маҳсулотларининг кўргазмаси ташкил этилди. Кўргазмада Хоразм вилоятининг мева-сабзовот ишлаб чиқариш салоҳияти тўла намойиш қилинди. Юқори мартабали меҳмон хоразмлик деҳқонлар ва тадбиркорлар билан суҳбатлашиб, ўзаро тажриба алмашиш ва маҳсулотлар экспортини йўлга қўйиш борасида фикр алмашиш имкониятига ҳам эга бўлди.
Ушбу масалалар вилоят ҳокими Фарҳод Эрманов билан ташкил этилган учрашувда ҳам атрофлича муҳокама қилинди. Учрашувда шунингдек, Ўзбекистон Республикаси Қишлоқ хўжалиги вазири Баҳодир Юсупов ҳам иштирок этди.
Томонлар маҳаллий маҳсулотлар экспорти ва унинг ташкилий-ҳуқуқий томонлари бўйича фикр алмашди. Шунингдек, учрашувда вилоят деҳқонлари томонидан етиштирилаётган мева-сабзавот маҳсулотларини шу ернинг ўзида қайта ишлашга ихтисослашган қўшма корхона ташкил этиш учун инвестиция жалб қилиш масаласи ҳам муҳокама қилинди. Бу вилояга хорижий инвестицияларни жалб этиш, янги иш ўринлари яратиш, тадбиркорларни қўллаб-қувватлаш, экспорт ҳажмини ошириш орқали маҳаллий бюджетга валюта тушуми ҳажмини оширишга хизмат қилади.
Изоҳ (0)