Хоразм вилоятининг Ҳазорасп туманидаги тиббиёт бирлашмаси бўлим бошлиғи Қ.Х. ўз ходимидан пора олиш ва ИИБ ходимига пора бериш жиноятларини содир қилгани учун қўлга олинди. Бу ҳақда вилоят ИИБ матбуот хизмати маълум қилди, дея хабар беради «Халқ сўзи».
Шу йил июлида Қ.Х. қўл остидаги ходими, ҳамшира Ш.Б.дан 50 АҚШ доллари миқдорида пора олаётган пайтда ушланган эди. Шундан сўнг унга нисбатан ЖКнинг 214-моддаси 2-қисми «б» банди билан жиноят иши очилган.
Бироқ у ИИБ ҳузуридаги Тергов бўлинмаси бошлиғи А.Рўзимовга мурожаат қилиб, агар жиноят ишини ўзининг фойдасига ҳал қилиб берса, унга таклиф қилинган 50 долларнинг 10 баробари миқдорида пул беришини билдиради. Қ.Х. таклиф қилган пулининг 400 долларилик қисмини бўлинма бошлиғига бераётганида жиноят устида қўлга олинди.
Мазкур ҳолат юзасидан шу куннинг ўзида унга нисбатан ЖКнинг 211-моддаси 1-қисми билан жиноят иши қўзғатилди. Ҳозирда тергов-суриштирув ишлари олиб борилмоқда.
Изоҳ (0)