Муддатидан олдин шартли равишда озод этиш бўйича комиссия Буюк Британиянинг «Битлз» гуруҳи собиқ аъзоси Жон Ленноннинг қотили Марк Дэвид Чемпеннинг арзномасини қондиришни яна бир бор рад этди, деб ёзади «Zakon.kz».
Комиссия аъзолари бу жамоатчилик хавфсизлигига мувофиқ келмаслиги туфайли, жиноятчини озодликка чиқариб бўлмайди, деган қарорга келган.
Энди 63 ёшли Чепмен 2020 йилдагина озод этилишга яна бир бор уриниб кўриши мумкин. Унгача эса Нью-Йорк штатидаги «Венде» қаттиқ режимли қамоқхонасида қолади.
Жон Ленноннинг беваси Ёко Ононинг адвокати айтишича, у комиссияга хат юбориб, Чепменни чиқармасликни сўраган.
Марк Дэвид Чепмен Жон Леннонни 1980 йил 8 декабрда унинг уйи яқинида отиб ташлаган. 25 дақиқадан кейин шифокорлар унинг қон йўқотиш оқибатидаги ўлимини қайд этган. Чепмен воқеа жойидан қочишга уринмаган. Суд уни ақли расо деб топиб, 20 йилдан кейин муддатидан олдин шартли озод этилиш ҳақида арзнома бериш ҳуқуқи билан умрбод қамоққа ҳукм қилган.
Изоҳ (0)