Янгиқўрғонда адлия сайли: ҳуқуқий маслаҳатлар, меҳнат ярмаркаси, шифокорлар кўриги ва ҳарбий парад (фото)

Наманган вилоятининг Янгиқўрғон туманида вилоят адлия бошқармаси ва туман ҳокимлиги ташаббуси билан «Ҳуқуқий ахборот куни» деб номланган оммавий адлия сайли ўтказилди. Бу ҳақда туман ҳокимлиги ахборот хизмати хабар берди.

Туман марказидаги «Экопарк» боғида ташкил этилган тадбирда давлат ва жамоат ташкилотлари вакиллари, ҳуқуқни муҳофаза қилиш идоралари мутасаддилари, тадбиркорлар, ёшлар, ОАВ ходимлари иштирок этди.

Тадбирда адлия бошқармаси, давлат нотариал идоралари, ФҲДЁ бўлимлари, ҳуқуқни муҳофаза қилувчи идоралар, давлат хизматлари марказлари, шунингдек, адвокатлар палатаси, давлат идораларининг юридик хизматлари томонидан бепул ҳуқуқий ёрдам кўрсатилишига мўлжалланган ҳуқуқий маслаҳат бурчаклари ташкил этилди.

Мазкур бурчакларда адлия ва давлат нотариал идоралари ходимлари томонидан турли ҳуқуқий мавзуларда 200 дан ортиқ фуқарога тушунтириш ва маслаҳат берилди, 400 дан ортиқ буклет тарқатилди. 13 нафар фуқаронинг мурожаати туман адлия бўлими иш юритувига қабул қилиниб, ижроси назоратга олинди.

Тадбир доирасида ташкил этилган меҳнат ярмаркасида вилоятнинг барча шаҳар ва туманларидан 90 дан зиёд иш берувчи қатнашди. Ярмаркада 150 га яқин иштирокчи доимий ишга жойлашиш учун йўлланма олди, 300 нафардан ортиқ фуқаронинг ишга жойлашиш бўйича мурожаати кўриб чиқилди.

Туман аҳолисининг тиббий маданиятини ошириш, соғлом турмуш тарзини тарғиб қилиш, жисмоний тарбия ва спортга жалб қилиш, ватанпарварлик туйғуларини юксалтиришга қаратилган тадбирлар сайлга байрамона руҳ бағишлади.

Жумладан, туманнинг марказий кўчаларида ҳарбий парад ва ҳарбий техникалар намойиш этилди. Ҳарбий қисм, Миллий гвардия ва «Ватанпарвар» ташкилоти вакиллари, спортчиларнинг кўргазмали чиқишлари йиғилганларда катта таассурот қолдирди.

Шифокорларнинг тиббий тавсияларидан эса кўпчилик баҳраманд бўлди.

Тадбирда миллий-маданий марказларнинг бадиий чиқишлари, дорбозлар ўйини, ҳунармандчилик маҳсулотлари намойиш этилди, китоб кўргазмаси ташкил этилди, маънавий-маърифий йўналишда турли кўрик-танловлар ўтказилди.

4 мингдан зиёд иштирокчини қамраб олган ушбу тадбир вилоят санъаткорлари иштирокидаги катта концерт дастури билан якунланди.