Yangiqo‘rg‘onda adliya sayli: huquqiy maslahatlar, mehnat yarmarkasi, shifokorlar ko‘rigi va harbiy parad (foto)

Namangan viloyatining Yangiqo‘rg‘on tumanida viloyat adliya boshqarmasi va tuman hokimligi tashabbusi bilan “Huquqiy axborot kuni” deb nomlangan ommaviy adliya sayli o‘tkazildi. Bu haqda tuman hokimligi axborot xizmati xabar berdi.

Tuman markazidagi “Ekopark” bog‘ida tashkil etilgan tadbirda davlat va jamoat tashkilotlari vakillari, huquqni muhofaza qilish idoralari mutasaddilari, tadbirkorlar, yoshlar, OAV xodimlari ishtirok etdi.

Tadbirda adliya boshqarmasi, davlat notarial idoralari, FHDYO bo‘limlari, huquqni muhofaza qiluvchi idoralar, davlat xizmatlari markazlari, shuningdek, advokatlar palatasi, davlat idoralarining yuridik xizmatlari tomonidan bepul huquqiy yordam ko‘rsatilishiga mo‘ljallangan huquqiy maslahat burchaklari tashkil etildi.

Mazkur burchaklarda adliya va davlat notarial idoralari xodimlari tomonidan turli huquqiy mavzularda 200 dan ortiq fuqaroga tushuntirish va maslahat berildi, 400 dan ortiq buklet tarqatildi. 13 nafar fuqaroning murojaati tuman adliya bo‘limi ish yurituviga qabul qilinib, ijrosi nazoratga olindi.

Tadbir doirasida tashkil etilgan mehnat yarmarkasida viloyatning barcha shahar va tumanlaridan 90 dan ziyod ish beruvchi qatnashdi. Yarmarkada 150 ga yaqin ishtirokchi doimiy ishga joylashish uchun yo‘llanma oldi, 300 nafardan ortiq fuqaroning ishga joylashish bo‘yicha murojaati ko‘rib chiqildi.

Tuman aholisining tibbiy madaniyatini oshirish, sog‘lom turmush tarzini targ‘ib qilish, jismoniy tarbiya va sportga jalb qilish, vatanparvarlik tuyg‘ularini yuksaltirishga qaratilgan tadbirlar saylga bayramona ruh bag‘ishladi.

Jumladan, tumanning markaziy ko‘chalarida harbiy parad va harbiy texnikalar namoyish etildi. Harbiy qism, Milliy gvardiya va “Vatanparvar” tashkiloti vakillari, sportchilarning ko‘rgazmali chiqishlari yig‘ilganlarda katta taassurot qoldirdi.

Shifokorlarning tibbiy tavsiyalaridan esa ko‘pchilik bahramand bo‘ldi.

Tadbirda milliy-madaniy markazlarning badiiy chiqishlari, dorbozlar o‘yini, hunarmandchilik mahsulotlari namoyish etildi, kitob ko‘rgazmasi tashkil etildi, ma’naviy-ma’rifiy yo‘nalishda turli ko‘rik-tanlovlar o‘tkazildi.

4 mingdan ziyod ishtirokchini qamrab olgan ushbu tadbir viloyat san’atkorlari ishtirokidagi katta konsert dasturi bilan yakunlandi.