Мудофаа вазирлиги қўшинларида «Маънавий юксалиш ва ватанпарварлик куни»га бағишланган йиғилишлар ўтказилмоқда. Бу ҳақда вазирлик матбуот хизмати хабар берди.
Республиканинг барча вилоятларида Ўзбекистон Президентининг «Ўзбекистон Республикаси Қуролли Кучлари ҳарбий хизматчиларининг маънавий-маърифий савиясини ошириш тизимини тубдан такомиллаштириш тўғрисида»ги 3898-сонли қарорнинг мазмун-моҳиятини барчага етказишга бағишланган тадбирлар бўлиб ўтмоқда.
Хусусан, 16 август куни Тошкент шаҳар ҳокимлигида ушбу қарорнинг ижросини таъминлаш борасида Тошкент шаҳар ҳудудий комиссиясининг мувофиқлаштирувчи йиғилиши ўтказилди. Тадбирни Мудофаа вазирининг тарбиявий ва мафкуравий ишлар бўйича ўринбосари полковник Азизбек Икрамов кириш сўзи билан очиб, ушбу қарорнинг мақсад ва вазифалари хусусида тўхталиб ўтди.
Шунингдек, Қашқадарё вилоятида ўтказилган йиғилишда Мудофаа вазирлиги ҳарбий ватанпарварлик ва маънавий-ахлоқий тарбия бошқармаси бошлиғи подполковник Хусан Ботиров, Қашқадарё вилояти ҳокими ўринбосари — вилоят Хотин-қизлар қўмитаси раиси Мақсуда Мустафоева, Жануби-ғарбий махсус ҳарбий округи қўмондонлиги, Қуролли Кучлар Академияси цикл бошлиғи полковник Зайниддин Суяров, шунингдек, ИИВ, Миллий Гвардия қўшинлари қўмондонлиги вакиллари иштирок этиб, маъруза қилди.
Тадбир иштирокчиларига юқоридаги қарор билан Ўзбекистон Республикаси Қуролли Кучлари тизимида ҳафтанинг ҳар жума куни «Маънавий юксалиш ва ватанпарварлик куни» этиб белгиланганлиги ва бу борада амалга оширилиши лозим бўлган ишларга оид асосий масалалар ҳақида батафсил маълумот ва тавсиялар берилди, олдинга қўйилган мақсадлар муҳокама қилинди.
Бугун, 17 август куни Чирчиқ олий танк қўмондонлик-муҳандислик билим юртида ўтказилган маънавий-маърифий тадбирда Чирчиқ шаҳар ҳокимлиги, республика Маънавият ва маърифат маркази ходимлари, Ўзбекистон ёшлар иттифоқи Чирчиқ шаҳар кенгаши фаоллари, Қуролли Кучлар фахрийлари, шаҳардаги мактабгача таълим муассасаси тарбияланувчилари, ўқувчи-ёшлар, маҳалла фуқаролари иштирок этди.
Қуролли Кучлар ашула ва рақс ансамбли хонандалари ҳамда «Турон» театр-студияси актёрлари томонидан ижро этилган куй-қўшиқлар концерт дастурига кўтаринки кайфият бахш этди.
Изоҳ (0)