9 август куни Мудофаа вазирлиги марказий аппаратида XVIII Ёзги Осиё ўйинларида иштирок этиш учун йўл олаётган 50 нафар Мудофаа вазирлиги спорт клуби спортчи ва 3 нафар мураббийларни кузатишга бағишланган тадбир бўлиб ўтди. Унда Мудофаа вазири генерал-майор Абдусалом Азизов, Ўзбекистон Миллий олимпиа қўмитаси раиси Умид Аҳмаджонов, Ўзбекистон Бокс федерацияси раисининг биринчи ўринбосари Шерзод Тошматов иштирок этди. Бу ҳақда вазирлик матбуот хизмати «Дарё»га маълум қилди.
Бу йилги Осиё ўйинларида иштирок этаётган Ўзбекистон спортчиларининг 22 фоизини Мудофаа вазирлиги спорт клуби вакиллари ташкил этади.
2018 йилда Ўзбекистон ўсмирлар, ёшлар ҳамда миллий терма жамоалари таркибида жаҳон чемпионатлари, Осиё биринчиликлари, дунё ва қитъа кубоги баҳслари, Гран-при туркумига кирувчи йирик халқаро мусобақалар ҳамда анъанавий хотира турнирларида иштирок этган Спорт клуби вакиллари бугунги кунга қадар жами 612 та медалга, улардан республика миқёсидаги баҳсларида 511 та, халқаро миқёсидаги мусобақаларда 101 медалига эгалик қилган.
Маълумот учун 2014 йилда Жанубий Кореянинг Инчеон шаҳрида бўлиб ўтган ХVII Ёзги Осиё ўйинларида мамлакатимиз терма жамоаси таркибига кирган Мудофаа вазирлиги Спорт клубининг 44 нафар спортчиси 10 та спорт тури бўйича иштирок этиб, 3 та олтин, 3 та кумуш ва 12 та бронза медалини қўлга киритган эди.
2018 йилнинг август—сентябрь ойларида Индонезиянинг Жакарта ва Палембанг шаҳарларида ўтказиладиган XVIII Ёзги Осиё ўйинларида Ўзбекистон терма жамоасидан жой олган 50 нафар Мудофаа вазирлиги спорт клуби аъзоси жами 11 та спорт тури бўйича иштирок этади. Улар жиу-жицу, кураш, бокс, таэквондо, енгил атлетика, каноэ ва байдаркада эшкак эшиш, оғир атлетика, дзюдо, отиш, теннис, трамполин каби спорт турларида Ўзбекистон шарафини ҳимоя қилади.
Изоҳ (0)