Тошкент шаҳар ИИББ хабарига кўра, клуб қўриқчиси ва меҳмон ўртасида чиққан можаро натижасида уч киши (уларнинг икки нафари қўриқчилар) пичоқдан олинган жароҳатлар билан шаҳар клиник шифохонасига ётқизилган.
Қайд этилишича, Жамшид Кенжаев пичоқ билан клубга киришга уринган. Қўриқчилар эса бунга йўл қўймагани учун Жамшид улардан бирига пичоқ билан зарба берган. Сўнг меҳмон ва қўриқчи ўртасида жанжал чиққан. Натижада Жамшид кўплаб тан жароҳати олган ва жароҳатлари сабаб бугун, 9 август эрталаб шифохонада вафот этган. Жамшидга тан жароҳатлари етказишда айбланиб, муассасанинг уч нафар ходими ҳибсга олинган. Улар – 24 ёшли Саидазим К., 29 ёшли Шодали К. ва 26 ёшли Жаҳонгир Я. Клуб қўриқчиси бўлиб ишловчи, ҳодисанинг икки нафар иштирокчиси 41 ёшли Шерали I. ва Абдурасул М. олган жароҳатлари натижасида ҳозирда шифохонада қолмоқда.
Мазкур ҳолат юзасидан Тошкент шаҳар прокуратураси томонидан Ўзбекистон Жиноят кодексининг 97-моддаси (Қасддан одам ўлдириш) аломатлари билан жиноят иши қўзғатилган.
Маълумот учун эркин кураш бўйича Ўзбекистон чемпиони бўлган Жамшид Кенжаев 61 ҳамда 65 кг вазн тоифаларида Инчеондаги Осиё ўйинлари—2014 да, шунингдек, 2015 йил Қатарда бўлиб ўтган Осиё чемпионатида Ўзбекистон шарафини ҳимоя қилган.
Aurum 898 тунги клуби Тошкентнинг Юнусобод туманида жойлашган. Юнусободдаги тунги клубларда эса тез-тез пичоқбозлик бўлиб туради. Масалан, июнь ойида «Осиё айиғи» Мурод Хонтўраев Юнусободдаги тунги клублардан бирида пичоқланганди. Кэйинроқ бу иш бўйича Хонтўраевнинг ўзи қамоққа олинганди.
Изоҳ (0)