Самарқандлик аёл ногирон фарзандига фуқаролик паспортини ололмаётгани тўғрисида хабар берган эдик.
Самарқанд шаҳридаги «Майсазор» маҳалласида яшовчи Раъно Қўлдошева 2002 йилда болалар бош мия фалажи билан туғилган фарзанди Темур Аҳроровнинг фуқаролик паспорти олишда муаммо юзага келгани хусусидаги мурожаати Самарқанд шаҳар Ички ишлар органлари фаолиятини мувофиқлаштириш бошқармаси Миграция ва фуқароликни расмийлаштириш бўлими томонидан ўрганилиб, муаммо ўз жойида бартараф этилди. Бу ҳақда «Дарё» мухбири Фарҳод Норбўтаев хабар бермоқда.
— Раъно Қўлдошеванинг мурожаатидан сўнг унинг ўғли Темур Аҳроровнинг мобил қурилма орқали биометрик ва биографик маълумотлари олиниб, Ўзбекистон Республикаси Вазирлар Маҳкамаси қошидаги Давлат персоналлаштириш марказига юборилди, — дейди Самарқанд шаҳар Ички ишлар органлари фаолиятини мувофиқлаштириш бошқармаси Миграция ва фуқароликни расмийлаштириш бўлими бошлиғи Шерзод Ҳалимов. — Ҳозирда фуқаро Т. Аҳроровга Ф-9 шаклидаги шахсни тасдиқловчи вақтинчалик маълумотнома берилди.
Т. Аҳроровнинг паспорт учун тўлов божи «Майсазор» маҳалла фуқаролар йиғини томонидан тўлаб берилган.
— Аввало, «Дарё» таҳририятига миннатдорчилик билдираман. Сизларга қилган мурожаатимдан сўнг ўғлимнинг паспорт олиш масаласи бир кунда ҳал бўлди, — дейди Раъно Қўлдошева. — Насиб қилса тез орада паспортни оламиз. Муаммога ўз вақтида эътибор қаратиб, ёрдам берган Самарқанд шаҳар ИИО ФМБ Миграция ва фуқароликни расмийлаштириш бошқармасига ҳам миннатдорчилик билдираман.
Маълумот учун, Самарқанд шаҳри бўйича жорий йилнинг 7 ойи мобайнида 24 106 нафар фуқароларга биометрик паспорт расмийлаштирилган бўлиб, шулардан 681 нафари ёши улуғ қариялар ва ногиронларнинг яшаш манзиллари бўйича мобил қурилма орқали фуқаролик паспортлари расмийлаштириб берилган.
Изоҳ (0)