Samarqandlik ayol nogiron farzandiga fuqarolik pasportini ololmayotgani to‘g‘risida xabar bergan edik.
Samarqand shahridagi “Maysazor” mahallasida yashovchi Ra’no Qo‘ldosheva 2002-yilda bolalar bosh miya falaji bilan tug‘ilgan farzandi Temur Ahrorovning fuqarolik pasporti olishda muammo yuzaga kelgani xususidagi murojaati Samarqand shahar Ichki ishlar organlari faoliyatini muvofiqlashtirish boshqarmasi Migratsiya va fuqarolikni rasmiylashtirish bo‘limi tomonidan o‘rganilib, muammo o‘z joyida bartaraf etildi. Bu haqda “Daryo” muxbiri Farhod Norbo‘tayev xabar bermoqda.
— Ra’no Qo‘ldoshevaning murojaatidan so‘ng uning o‘g‘li Temur Ahrorovning mobil qurilma orqali biometrik va biografik ma’lumotlari olinib, O‘zbekiston Respublikasi Vazirlar Mahkamasi qoshidagi Davlat personallashtirish markaziga yuborildi, — deydi Samarqand shahar Ichki ishlar organlari faoliyatini muvofiqlashtirish boshqarmasi Migratsiya va fuqarolikni rasmiylashtirish bo‘limi boshlig‘i Sherzod Halimov. — Hozirda fuqaro T. Ahrorovga F-9 shaklidagi shaxsni tasdiqlovchi vaqtinchalik ma’lumotnoma berildi.
T. Ahrorovning pasport uchun to‘lov boji “Maysazor” mahalla fuqarolar yig‘ini tomonidan to‘lab berilgan.
— Avvalo, “Daryo” tahririyatiga minnatdorchilik bildiraman. Sizlarga qilgan murojaatimdan so‘ng o‘g‘limning pasport olish masalasi bir kunda hal bo‘ldi, — deydi Ra’no Qo‘ldosheva. — Nasib qilsa tez orada pasportni olamiz. Muammoga o‘z vaqtida e’tibor qaratib, yordam bergan Samarqand shahar IIO FMB Migratsiya va fuqarolikni rasmiylashtirish boshqarmasiga ham minnatdorchilik bildiraman.
Ma’lumot uchun, Samarqand shahri bo‘yicha joriy yilning 7 oyi mobaynida 24 106 nafar fuqarolarga biometrik pasport rasmiylashtirilgan bo‘lib, shulardan 681 nafari yoshi ulug‘ qariyalar va nogironlarning yashash manzillari bo‘yicha mobil qurilma orqali fuqarolik pasportlari rasmiylashtirib berilgan.
Izoh (0)