Олий Мажлис Сенатининг Ёшлар, маданият ва спорт масалалари қўмитасининг ўтган даврдаги фаолияти якунлари ва истиқболдаги йўналишларига бағишланган матбуот анжуманида тўйларни ихчамлаштириш масаласи яна кўтарилди. Бу ҳақда «Халқ сўзи» хабар берди.
«Тўйлар халқ ҳаётига шу қадар чуқур сингиб кетган қадриятки, бу масалада ягона тўхтамга келиш, уни ихчамлаштириш масаласи ҳали ҳам кун тартибидан тушгани йўқ. Бу борада шу пайтга қадар бирор бир ҳужжатнинг қабул қилинмаганини баъзи одамлар тўғри тушунмаяпти. Давлат раҳбари бу борада халқ ўзи онгли равишда тушуниб, тўғри қарорга келиши ҳақида кўп бора таъкидламоқда», — деди қўмита раиси Иқбол Мирзо.
Сенатор бу масалага тўхталар экан, Тошкент шаҳрининг Олмазор тумани намуна сифатида ўрганилаётган бўлсада, у ерда ҳам кўзбўямачилик ҳолати кузатилаётганига урғу берди.
«Олмазор тумани намуна сифатида ўрганиляпти. Аммо шу масалада ҳам яна кўзбўямачиликка йўл қўйяпмиз. Маҳалла раислари ўзи асли 50,60 кишилик тўй қилишга шароити бор ва шундан келиб чиқиб ихчамгина тўй ўтказаётган одамларни намуна қилиб, уларни гапиряпти. Йўқ, бу билан иш битмайди. Биз кўпроқ исрофгарчиликка йўл қўяётганлар, никоҳни ўзига хос шоуларга айлантираётганлар билан ишлашни ўрганишимиз, айнан уларга тушунтиришимиз керак. Қўмитанинг бу борадаги фаолияти тўхтагани йўқ. Фикрларни, муносабатларни ўрганяпмиз», дея таъкидлаган сенатор.
Изоҳ (0)