Сурхондарё ҳокими вазифасини бажарувчи Баҳодир Пўлатов раҳбарлигидаги делегация аъзоларининг Хитой Халқ Республикасига уюштирган сафари ўз якунига етди. Бу ҳақда Сурхондарё ҳокимлиги матбуот хизмати «Дарё»га хабар бермоқда.
Вилоят вакилларининг сафари Сичуань провинцияси ва Чэнду шаҳар мерияси раҳбарияти билан учрашувдан бошланди. Провинция губернатори Ин Ли билан бўлиб ўтган мулоқотда Сурхондарё ҳамда Сичуань провинцияси ўртасидаги ҳамкорликни ривожлантириш бўйича келишувга эришилди.
Сафарнинг иккинчи куни Сурхондарё ва Сичуань ишбилармон доираларининг 140 дан зиёд вакиллари иштирокида савдо-иқтисодий форум ташкил этилди. Тадбирда Сурхондарёдаги «Бойсун-фарм» эркин иқтисодий зонасида хорижлик сармоядорлар учун яратилган имтиёзлар хусусида маълумот берилди.
Вилоят вакиллари «Chengdu Yinlu Food Co. LTD» компанияси фаолияти билан яқиндан танишди. Компания озиқ-овқат маҳсулотлари, сут, ичимликлар ҳамда бошқа маҳсулотлар ишлаб чиқаради.
Хитой томони Термиздаги «Термиз карго» халқаро интермодал логистика марказида лойиҳаларни ҳамкорликда амалга оширишга қизиқиш билдирди.
Вилоят делегациясининг Хитой Халқ Республикасига сафари давомида йирик саноат корхоналари билан умумий қиймати 257 миллион долларлик шартномалар имзоланди.
Изоҳ (0)