Surxondaryo hokimi vazifasini bajaruvchi Bahodir Po‘latov rahbarligidagi delegatsiya a’zolarining Xitoy Xalq Respublikasiga uyushtirgan safari o‘z yakuniga yetdi. Bu haqda Surxondaryo hokimligi matbuot xizmati “Daryo”ga xabar bermoqda.
Viloyat vakillarining safari Sichuan provinsiyasi va Chendu shahar meriyasi rahbariyati bilan uchrashuvdan boshlandi. Provinsiya gubernatori In Li bilan bo‘lib o‘tgan muloqotda Surxondaryo hamda Sichuan provinsiyasi o‘rtasidagi hamkorlikni rivojlantirish bo‘yicha kelishuvga erishildi.
Safarning ikkinchi kuni Surxondaryo va Sichuan ishbilarmon doiralarining 140 dan ziyod vakillari ishtirokida savdo-iqtisodiy forum tashkil etildi. Tadbirda Surxondaryodagi “Boysun-farm” erkin iqtisodiy zonasida xorijlik sarmoyadorlar uchun yaratilgan imtiyozlar xususida ma’lumot berildi.
Viloyat vakillari “Chengdu Yinlu Food Co. LTD” kompaniyasi faoliyati bilan yaqindan tanishdi. Kompaniya oziq-ovqat mahsulotlari, sut, ichimliklar hamda boshqa mahsulotlar ishlab chiqaradi.
Xitoy tomoni Termizdagi “Termiz kargo” xalqaro intermodal logistika markazida loyihalarni hamkorlikda amalga oshirishga qiziqish bildirdi.
Viloyat delegatsiyasining Xitoy Xalq Respublikasiga safari davomida yirik sanoat korxonalari bilan umumiy qiymati 257 million dollarlik shartnomalar imzolandi.
Izoh (0)