Жанубий Кореялик инвесторлар Фарғонада тўрт юлдузли меҳмонхона ва кўп қаватли уйлар қуради

Фарғона вилояти ҳокими Шуҳрат Ғаниев бошчилигидаги делегация Жанубий Кореяда бўлиб, уч кун давомида Сеул, Инчеон, Гванжу, Хвасонг ва Пхочхон шаҳарлари раҳбарияти билан учрашувлар ўтказди. Бу ҳақда «Дарё» мухбири Азизжон Эрматов хабар бермоқда.

Ташриф давомида Sang Myong компанияси билан тузилган келишувга асосан Учкўприк туманида 12 гектар майдонда туризм маркази ва тиббиёт клиникаси ташкил этишга тўғридан-тўғри хорижий инвестиция киритилади. Doori Enginering компанияси билан Фарғона туманидаги «Баҳодир Агросаноат» МЧЖ ўртасида имзоланган келишувга кўра, 50 гектар майдонда гидропоника усулида иссиқхона ташкил этилади. Етиштирилган маҳсулотларни Жанубий Кореяга экспорт қилиш режалаштирилган.

Crechiko компанияси томонидан Фарғонада йирик паррандачилик комплексини ташкил этиб, йилига 10 минг тонна товуқ гўшти ишлаб чиқариш лойиҳасини амалга ошириш бўйича ҳам келишувга эришилди. Taeho Machinery компанияси билан Фарғона туманидаги «Баҳодир Лоғон текстил» қўшма корхонаси ўртасида имзоланган битимга асосан трикотаж ишлаб чиқариш линияси ташкил этиш ва тайёр маҳсулотларни Жанубий Кореяга экспорт қилиш бўйича шартнома тузилди. UKO Глобал Light компанияси билан имзоланган меморандумга кўра, Фарғона шаҳрида чиқиндини қайта ишлаш ва ундан энергия ишлаб чиқаришни ташкил этиш лойиҳаси амалга оширилади.

Chung Construction Design Group компанияси билан Фарғона шаҳрида тўрт юлдузли меҳмонхона ва замонавий кўп қаватли уйларни лойиҳалаш ва қуриш бўйича меморандум имзоланди.

Шунингдек, Korea Heating Corporation компанияси президенти билан ўтказилган учрашувда вилоят шаҳарларида иситиш тизимини реконструкция қилиш бўйича ҳамкорликда иш олиб боришга келишиб олинди.

Инчеон шаҳрида Evergreen Motors Group компанияси ташаббуси билан ташкил этилган Ўзбекистон – Корея бизнес марказида мазкур муассаса билан ҳамкорлик ўрнатиш, вилоятнинг Корея Республикасига маҳсулотлар экспортини ошириш ва Фарғонага кореялик инвесторларни жалб этиш бўйича музокаралар олиб борилди. Музокаралар давомида Фарғона вилояти ва «Инчеон» эркин иқтисодий зонаси ўртасида ҳамкорлик меморандуми имзоланди.

Фарғона вилояти ва Пхочхон-Си шаҳри маъмурияти ўртасида Қўқон ва Пхочхон-Си шаҳарлари ўртасида биродарлик алоқаларини ўрнатиш бўйича меморандум имзоланди.

Жанубий Корея сафари давомида имзоланган ҳужжатлар асосида Фарғона вилоятига катта миқдорда хорижий инвестиция жалб этилиши кутилмоқда.