Нукус давлат педагогика институтининг янги биноси 2000 ўринлик ўқув биноси, ректорат, ахборот-ресурс маркази ва ҳар бири 180 ўриндан иборат жами 720 ўринлик 4 катта аудиториядан иборат бўлади. Бу ҳақда «Karinform.uz» хабар бермоқда.
Институт янги биносининг қурилиш ишларига 53,6 миллиард сўм ажратилган.
Бугунги кунда 720 ўринлик аудиторияларнинг қурилиш ишлари олиб борилмоқда.
Маълумотларга кўра, институт бош биноси 7 қаватдан иборат бўлиб, 1-4 қаватлари ўқув биноси ва 5-7 қаватлари ректорат ва ахборот-ресурс маркази бўлиши режалаштирилган.
Нукус давлат педагогика институтининг янги биноси қурилиши Ўзбекистон Республикаси Президентининг 2017 йил 20 апрелдаги «Олий таълим тизимини янада ривожлантириш чора-тадбирлари тўғрисида»ги қарори асосида давлат дастурига киритилган эди.
Институт ўқув бинолари Нукус шаҳрининг тўрт томонида, бир-биридан 7-10 километр масофада жойлашганлиги туфайли уларни бир жойга тўплаш мақсадида Ўзбекистон ҳукумати қарори билан Нукус агроиқтисодиёт коллежи, Нукус мелиорация ва сув хўжалиги коллежи ҳамда Нукус педагогика коллежи ўқувчилар турар жойи тегишли ҳудудлари билан институт балансига бепул ўтказиб берилган эди.
Институтнинг янги биноси шу ҳудудда бунёд этилмоқда. Қурилиш ишлари 2019 йил охирида якунланиши режалаштирилган.
Изоҳ (0)