Бухоро вилоят Ички ишлар бошқармасида Ўзбекистон Республикаси Президенти Шавкат Мирзиёев раҳбарлигида бўлиб ўтган кенгайтирилган видеоселектор йиғилишида берилган топшириқлар ижросини таъминлаш ва назорат қилиш масалаларига бағишланган йиғилиш бўлиб ўтди. Бу ҳақда вилоят ИИБ «Дарё»га маълум қилди.
Йиғилишда дастлаб Ҳуқуқбузарликлар профилактикаси ва жиноятчиликка қарши курашиш бўйича вилоят идоралараро комиссияси томонидан 2018 йилнинг 6 ойи мобайнида ҳамкорликда амалга оширилган ишлар, йўл қўйилган камчиликлар ва келгусидаги вазифалар хусусида сўз борди.
Таъкидланганидек, жойлардаги комиссиялар томонидан профилактик тадбирлар тизимли равишда ташкил этилмаганлиги сабабли, 2018 йилнинг 6 ойида оғир ва ўта оғир турдаги жиноятларнинг айрим шаҳар-туманларда кўпайиб кетишига йўл қўйилган.
Хусусан, қотиллик жиноятлари вилоятда 14 тадан 13 тага камайган бир вақтда, Когон, Пешкў, Вобкент ва Жондор туманларида нисбатан кўп содир этилган. Шунингдек, қасддан баданга оғир тан жароҳати етказиш жинояти ҳам вилоят бўйича 22 тадан 19 тага камайган бўлса-да, бу турдаги жиноятлар Ғиждувон, Қоровулбозор ва Шофиркон туманларида анча ошган.
Жорий йилнинг 6 ойи мобайнида хотин-қизлар томонидан содир қилинган жиноятлар вилоятда 371 тадан 185 тага ёки 50,1 фоизга камайган бўлсада, лекин ўтган даврда аксарият шаҳар-туманларда аёллар ўртасида жиноятчиликнинг олдини олиш борасидаги ишлар талаб даражасида ташкил этилмаганлиги натижасида бу тоифа шахслар томонидан содир этилган жиноятлар Бухоро туманида 4 тага ва Қоракўл туманида 3 тага кўп қайд қилинди.
Шу билан бирга, йиғилишда Ўзбекистон Республикаси Вазирлар Маҳкамасининг 2018 йил 8 январдаги «Фуқаролар ва жамоат ташкилотларини ҳуқуқбузарликлар профилактикаси ва жиноятчиликка қарши курашишдаги фаол иштироки учун рағбатлантириш тартиби тўғрисида низомни тасдиқлаш ҳақида»ги Қарорига асосан ҳуқуқбузарликлар ва жиноятчиликка қарши курашишда фаол иштирок этган 16 нафар фуқаролар ички ишлар бошқармаси томонидан пул ва эсдалик совғалар билан рағбатлантирилди.
Изоҳ (0)