4 август куни бўлиб ўтган тест имтиҳонлари натижалари эълон қилинди

Ўзбекистон бош вазири ўринбосари Азиз Абдуҳакимов 4 август куни бўлиб ўтган тест имтиҳонлари жараёни ҳақида қисқа ахборот берди, шунингдек, шанба кунги имтиҳон жавоблари қачон эълон қилинишини билдирди. Бу ҳақда у Facebook’даги саҳифасида ёзиб қолдирган.

Шундай қилиб, 4 август кунги тест синовлари шахсни идентификациялаш воситалари, видеофиксация ҳамда доимий видеокузатув қурилмалари билан жиҳозланган 57 та бинода 15 та олий таълим муассасаларининг 80 та таълим йўналиши бўйича ўтказилди.

Тест синовларида 56 966 нафар абитуриент иштирок этди. Тест синовларига 1 369 нафар абитуриент келмади. Тест синовлари тартиб қоидаларини бузганлиги сабабли 73 нафар абитуриент тест синовларидан четлаштирилди.

Давлат гранти бўйича энг юқори ўтиш бали Фарғона политехника институтининг «Иқтисодиёт (тармоқлар ва соҳалар бўйича)» таълим йўналишида қайд этилди — 175,8 балл. Тўлов-контракт бўйича энг юқори ўтиш бали эса Ўзбекистон давлат жаҳон тиллари университетининг «Таржима назарияси ва амалиёти: инглиз тили» таълим йўналишида қайд этилиб, 147,6 баллни ташкил этди.

Шунга кўра, 4 август куни бўлиб ўтган тест имтиҳонларида ўртача ўтиш бали давлат гранти бўйича – 97,9 балл, тўлов-контракт бўйича эса – 80,5 баллга тенг бўлди.

«Тест синовлари натижалари Давлат тест марказининг http://www.dtm.uz/page/test_result саҳифасида 2018 йил 5 август куни соат 19:15 да эълон қилинади», — дейилади Абдуҳакимовнинг ахборотида.