Ўзбекистондаги 15 та олий таълим муассасасида тест синовлари бир вақтда 8:00 дан бошланиб, 11:30 га қадар тўлиқ якунланди. Бу ҳақда Бош вазир ўринбосари Азиз Абдуҳакимов Facebook’даги саҳифасида маълум қилди.
Тест синовларида 50 та таълим йўналишида 30 минг 690 нафар абитуриент иштирок этди.
Тезкор маълумотларга кўра, тест синовларида 29 856 нафар абитуриент қатнашди, 834 нафар абитуриент турли сабабларга кўра имтиҳонга келмади.
Бундан ташқари, тест синовлари тартиб қоидаларини бузганлиги (ҳудудга кириш жойида уяли телефон, шпаргалкалар олиб киришга уринганлиги учун) сабабли 76 нафар абитуриент имтиҳонлардан четлаштирилди.
Тест синовларини ўтказишга таълим муассасаларидан 2 минг 469 нафар гуруҳ назоратчиси жалб этилиши белгиланган. Шундан 35 нафари иштирок этмади.
Тест натижалари Фелдегерлик хизмати томонидан махфийлиги ва дахлсизлигини таъминлаган ҳолда Давлат тест марказига 2-cмена якунлангандан сўнг 18:30 дан қайтариш бошланади.
Тошкент шаҳрида тест материаллари 1-смена тугаши билан 12:00дан бошлаб Давлат тест марказига қайтарилади. Етиб келган тест натижалари бўйича дарҳол компьютер ёрдамида қайта ишлаш жараёни бошланади.
Тест натижаларини қайта ишлашда иштирок этадиган ходимлар тест синовларидан бир кун олдин ташқи дунёдан узилган ҳолда натижалар эълон қилингунга қадар Тест марказида яшайди (ташқарига чиқмасдан, телефон ва бошқа алоқа воситаларисиз).
Тегишли хизматлар томонидан ўрнатилган тартибда жамоат ва ёнғин хавфсизлиги, тест материалларининг махфий ва даҳлсизлиги, бинолар фаолият тизимининг узлуксиз ишлаши, тиббий хизмат ва иншоотларни қўриқлаш тўлиқ таъминланди.
Тест синовлари белгиланган режа асосида ўтказилди ва ўтказиш жараёнида ҳеч қандай кўнгилсиз ҳодисалар рўй бермади.
Изоҳ (0)