Республика ишчи гуруҳи 2 кунда Фарғонанинг Ёзёвон туманида 2 мингдан ортиқ муаммони аниқлади
Маҳаллаларда ва оилаларда ижтимоий-маънавий муҳитни ўрганиш ҳамда аниқланган муаммоларни бартараф этишга кўмаклашиш бўйича ташкил этилган Республика ишчи гуруҳи Фарғона вилояти Ёзёвон туманида аҳолининг турмуш шароитлари билан танишмоқда. Бу ҳақда «Дарё» мухбири Азизжон Эрматов хабар берди.
Дастлабки икки кунда Республика ишчи гуруҳи томонидан 17 та маҳалла фуқаролар йиғини ўрганилиб, 7 865 та хонадонга уйма-уй кириб чиқилди. Турли йўналишларда жами 2 379 та муаммо аниқланди. Мазкур муаммоларнинг 577 таси ҳал этилди. Қолган 1 802 та мурожаат ўрнатилган тартибда ҳал қилиш учун вилоят ва туманнинг тегишли ташкилотларига юборилди.
71 нафар ногиронлиги бор, ёлғиз яшовчи, ўзгалар парваришига муҳтожлар ҳолидан хабар олинди. 4 нафар ногиронга ногиронлик аравачаси берилди.
Электр энергияси таъминотидаги камчиликларни бартараф этиш мақсадида 7 дона янги трансформатор ўрнатилди. 13 километр электр тармоқлари тортилди. Шунингдек, 156 та бетон таянч устунлари олиб келинди. Мазкур таянч устунларини «Баҳор», «Қоратепа», «Порлоқ», «Қатортол», «Дўстлик», «Тегирмонбоши», «Ёшлик» маҳаллаларида ўрнатиш ва тармоқ тортиш ишлари олиб борилмоқда. Бу ишлар натижасида 1 056 хонадоннинг электр таъминоти яхшиланди.
Икки кун давомида 4 маҳалладаги 7 та кўчада 1 100 метр узунликдаги йўл қум ва шағал аралашмаси билан қопланди, 200 метр йўл асфальт қилинди.
Ичимлик суви таъминотини яхшилаш мақсадида 7,4 километр тармоқ тортиш ишлари бошланди. 1 та сув минораси ва насоси таъмирланди.
Республика ишчи гуруҳи ўрганишлари давом этмоқда.
