Mahallalarda va oilalarda ijtimoiy-ma’naviy muhitni o‘rganish hamda aniqlangan muammolarni bartaraf etishga ko‘maklashish bo‘yicha tashkil etilgan Respublika ishchi guruhi Farg‘ona viloyati Yozyovon tumanida aholining turmush sharoitlari bilan tanishmoqda. Bu haqda “Daryo” muxbiri Azizjon Ermatov xabar berdi.
Dastlabki ikki kunda Respublika ishchi guruhi tomonidan 17 ta mahalla fuqarolar yig‘ini o‘rganilib, 7 865 ta xonadonga uyma-uy kirib chiqildi. Turli yo‘nalishlarda jami 2 379 ta muammo aniqlandi. Mazkur muammolarning 577 tasi hal etildi. Qolgan 1 802 ta murojaat o‘rnatilgan tartibda hal qilish uchun viloyat va tumanning tegishli tashkilotlariga yuborildi.
71 nafar nogironligi bor, yolg‘iz yashovchi, o‘zgalar parvarishiga muhtojlar holidan xabar olindi. 4 nafar nogironga nogironlik aravachasi berildi.
Elektr energiyasi ta’minotidagi kamchiliklarni bartaraf etish maqsadida 7 dona yangi transformator o‘rnatildi. 13 kilometr elektr tarmoqlari tortildi. Shuningdek, 156 ta beton tayanch ustunlari olib kelindi. Mazkur tayanch ustunlarini “Bahor”, “Qoratepa”, “Porloq”, “Qatortol”, “Do‘stlik”, “Tegirmonboshi”, “Yoshlik” mahallalarida o‘rnatish va tarmoq tortish ishlari olib borilmoqda. Bu ishlar natijasida 1 056 xonadonning elektr ta’minoti yaxshilandi.
Ikki kun davomida 4 mahalladagi 7 ta ko‘chada 1 100 metr uzunlikdagi yo‘l qum va shag‘al aralashmasi bilan qoplandi, 200 metr yo‘l asfalt qilindi.
Ichimlik suvi ta’minotini yaxshilash maqsadida 7,4 kilometr tarmoq tortish ishlari boshlandi. 1 ta suv minorasi va nasosi ta’mirlandi.
Respublika ishchi guruhi o‘rganishlari davom etmoqda.
Izoh (0)