«Ўзавтосаноат» АЖ автомобилларни ички ва ташқи бозорга бир хил улгуржи нархда савдога чиқаради. Бу ҳақда 30 июль куни Халқаро пресс клубнинг «Ўзавтосаноат» АЖ фаолиятига бағишлаб ўтказилган сессиясида маълум қилинди, деб хабар беради «Дарё» мухбири Севара Нишонова.
«Бозорда машинанинг нархини белгилаш билан маркетинг хизмати шуғулланади. Нарх белгилаш автомобилнинг опцияларига мувофиқ равишда амалга оширилади.
Ҳозирги кунда харидорларимизнинг аксарияти Nexia 3 автомобилига қизиқиш билдирмоқда. Шунинг учун ушбу автомобиль кўп сотилмоқда. Биз ҳозирги кунда ҳар битта машинанинг ишлаб чиқариш ҳажмини оширдик. Бу битта Damas’га тегишли эмас, чунки ҳозир Cobalt, Nexia, Lacetti каби автомобилларимизга ҳам катта эҳтиёж бор. Автмобилларни етказиб бериш жараёнини биз алоҳида кўриб чиқдик. Чунки заводдан машинани етказиб беришга ҳам анча вақт кетади, бу вақтни қисқартириш масаласини белгилаб олдик.
Таннархга келадиган бўлсак, бутловчи қисмлар етказиб берувчи компаниялар билан келишган ҳолда эҳтиёт қисмлар нархини 20 фоизга арзонлаштиришга келишиб олдик. Автомашиналар нархини 9 фоизга туширсак, бу ҳамма моделга, ҳамма опсияларга тўғри келадиган тақсимот бўлади. Ички бозор ва ташқи бозорда машина опцияларига бўлган талаб ҳар хил бўлиши мумкин. Лекин машинанинг улгуржи нархи бир хил. Россия, Украина ва Беларусдаги нархларни қарайдиган бўлсак, барибир нархлар фарқланади. Чунки бу мамлакатларда бозор коньюктураси ҳар хил.
Volkswagen, Toyota каби йирик автоконцернлар тажрибасини мисол қилсак, улар ҳам хорижий бозорга кириш учун ўз маҳсулотлари нархини бозор коньюктурасига мослаштиради», — дейди «Ўзавтосаноат» АЖ бошқарув раиси ўринбосари Умиджон Салимов.
Изоҳ (0)