Самарқанд вилояти божхона бошқармаси ходимлари Самарқанд туман ИИБ ходимлари билан ҳамкорликда Самарқанд тумани «Янгиобод» МФЙда яшовчи фуқаро М.М.га тегишли хонадонда холислар иштирокида тезкор-қидирув тадбири ўтказди. Бу ҳақида «Дарё» мухбири Фарҳод Норбўтаев хабар бермоқда.
Тадбир давомида хонадондан яшил рангли, ўткир ҳидли, ҳўл ҳолдаги соф оғирлиги 2 килограмм 68 граммни ташкил этувчи каннабис гиёҳвандлик ўсимлиги ва қуруқ ҳолда ўзига хос ўткир ҳидли умумий соф оғирлиги 77,94 грамм марихуана гиёҳвандлик воситаси борлиги аниқланди.
Дастлабки суриштирув жараёнида маълум бўлишича фуқаро М.М. «ажал» уруғларини баҳор ойларида ўзи яшаш хонадонига экиб, парвариш қилганлиги маълум бўлди. Тадбирга жалб этилган мутахассислар ҳам ушбу гиёҳвандлик ўсимликлари экилиб, махсус парвариш қилинганлигини тасдиқлашди. Ҳозирда ушбу ҳолатлар юзасидан терговга қадар текширув ҳаракатлари олиб борилмоқда.
60 ёшни қоралаб қолган фуқаро М.М.ушбу жиноий ҳаракатлари учун энди Қонун олдида жавоб беради, дейди Самарқанд вилояти божхона бошқармаси ахборот хизмати.
Изоҳ (0)