Тошкент шаҳридаги Инҳа университетида 28 июль куни «Ажойиб математика» фестивали очилди. Бу ҳақда университет матбуот хизмати хабар бермоқда.
Фестивалнинг асосий мақсади математиканинг мўъжизаларини намойиш этиш ва математика жуда қизиқарли эканлигини намойиш этиш ва ушбу фанни ўқитиш ва ўрганиш қизиқарли эканини кўрсатишдан иборат.
«Ажойиб математика» фестивали мактаб ва бошқа таълим ташкилотлари ўқувчилари, математика ўқитувчилари ҳамда ушбу фанга қизиққан ва севганларга мўлжалланган.
Тадбирда иштирок этиш учун Корея Республикасидан 25 нафар математика бўйича профессор ва ўқитувчилар ташриф буюрди. Улар фестиваль доирасида 25 та математика стендлари тақдим этди.
Уч кун давомида Жанубий Кореядан келган мутахассислар стендларда турли пазллар, машқлар ва мисолларни болаларга тақдим этадилар ва ўз билимлари билан бўлишадилар. Тадбир давомида болалар учун танловлар ва математика бўйича хорижий мутахассисларнинг маърузалари ҳам ташкил этилади.
Фестиваль доирасида «Дастурлаш соати» акцияси ташкил этилади. Акция давомида болалар дастурлаш асосларига бағишланган бир соатлик бепул дарсда иштирок этиши мумкин.
Фестиваль Тошкент шаҳридаги Инҳа университети, Жанубий Кореянинг Инҳа университети ҳамда Кореянинг ўқитувчилар учун математика маданиятини тадқиқ этиш жамияти тамонидан ташкил этиляпти. Фестиваль Ўзбекистон Республикаси Ахборот технологиялари ва коммуникацияларини ривожлантириш вазирлиги, Ўзбекистон Республикаси Халқ таълими вазирлиги, Ўзбекистон олий ва ўрта махсус таълим вазирлиги ҳамда Korzinka.uz супермаркетлар тизими ва Mercury Services компанияси томонидан қўллаб-қувватланяпти.
Изоҳ (0)