2018 йил 28 июль куни соат 01:30да Тошкент шаҳар ИИББ навбатчилик қисмига 1977 йилда туғилган Маъруф исмли фуқародан Damas автомобилининг ўғирлаб кетилгани ҳақидаги хабар келиб тушди.
Маъруф 28 июлга ўтар кечаси тахминан соат 00:00да таниши Бориснинг уйига меҳмонга ўзи ишлайдиган Тошкент шаҳар электр тармоқлари корхонасига тегишли бўлган, яшил рангли Damas русумли автомобилда бориб, машинани унинг уйи — Яшнобод тумани, Ховос 2-тор кўчаси, 2-уй олдида қолдириб, ичкарига кириб кетган. Бироқ орадан маълум вақт ўтиб, машинанинг жойида йўқлигини кўргач, 102 рақамига хабар берган.
ППХ ва Миллий Гвардия ходимлари томонидан олиб борилган тезкор тадбирлар натижасида Миробод тумани Толимаржон кўчаси, «Ўзелектроаппарат» корхонаси томонда ўғирланган Damas машинаси тўхталиган. Уни бошқариб бораётган 33 ёшли Юрий.С ва 25 ёшли Виктор.С эса автотранспорт воситасини олиб қочишда гумон қилиниб қўлга олинган.
Маълум бўлишича, «жабрланувчи» ва «ҳуқуқбузар»лар ўзаро яхши таниш бўлиб, машина «ўғирлангунга» қадар бирга кўнгилхушлик қилган. Кейин эса автомобиль эгаси ухлаб қолган пайтда унинг дўстлари машинада сайр этишга қарор қилган. Қолаверса, машина калити салонда, эшиклар эса қулфланмаган бўлган.
Мазкур ҳолат юзасидан Маъруфга нисбатан Маъмурий жавобгарлик тўғрисидаги кодекснинг 199-моддасига биноан тегишли чора қўлланилди.
Изоҳ (0)