2018-yil 28-iyul kuni soat 01:30da Toshkent shahar IIBB navbatchilik qismiga 1977-yilda tug‘ilgan Ma’ruf ismli fuqarodan Damas avtomobilining o‘g‘irlab ketilgani haqidagi xabar kelib tushdi.
Ma’ruf 28-iyulga o‘tar kechasi taxminan soat 00:00da tanishi Borisning uyiga mehmonga o‘zi ishlaydigan Toshkent shahar elektr tarmoqlari korxonasiga tegishli bo‘lgan, yashil rangli Damas rusumli avtomobilda borib, mashinani uning uyi — Yashnobod tumani, Xovos 2-tor ko‘chasi, 2-uy oldida qoldirib, ichkariga kirib ketgan. Biroq oradan ma’lum vaqt o‘tib, mashinaning joyida yo‘qligini ko‘rgach, 102 raqamiga xabar bergan.
PPX va Milliy Gvardiya xodimlari tomonidan olib borilgan tezkor tadbirlar natijasida Mirobod tumani Tolimarjon ko‘chasi, “O‘zelektroapparat” korxonasi tomonda o‘g‘irlangan Damas mashinasi to‘xtaligan. Uni boshqarib borayotgan 33 yoshli Yuriy.S va 25 yoshli Viktor.S esa avtotransport vositasini olib qochishda gumon qilinib qo‘lga olingan.
Ma’lum bo‘lishicha, “jabrlanuvchi” va “huquqbuzar”lar o‘zaro yaxshi tanish bo‘lib, mashina “o‘g‘irlangunga” qadar birga ko‘ngilxushlik qilgan. Keyin esa avtomobil egasi uxlab qolgan paytda uning do‘stlari mashinada sayr etishga qaror qilgan. Qolaversa, mashina kaliti salonda, eshiklar esa qulflanmagan bo‘lgan.
Mazkur holat yuzasidan Ma’rufga nisbatan Ma’muriy javobgarlik to‘g‘risidagi kodeksning 199-moddasiga binoan tegishli chora qo‘llanildi.
Izoh (0)