Фарғонада синглисини калтаклаб, унинг ўлимига сабаб бўлган акага суд ҳукми билан жазо тайинланди.
Жиноят ишлари бўйича Фурқат туман судининг хабар беришича, судланувчи И.М. икки йил аввал турмуш ўртоғидан ажрашиб, ота уйига қайтиб келган 24 яшар синглисини тартибга чақириб қўйиш ниятида бўлган. Аканинг наздида яшаш хонадонидан рухсатсиз чиқиб кетиб, 10 кун бедарак кетган сингил ўз хатти-ҳаракатлари билан оила шаънини ерга урган.
Дастлаб синглисининг юзига бир-икки шапалоқ урган ака ўзини тутиб тура олмасдан белидаги чарм тасма билан калтаклаган. Қорин соҳасига қасддан бир неча маротаба тепиб, жабрланувчига ҳаёти учун хавфли бўлган оғир тан жароҳати етказган. Натижада соғлиги ёмонлашиб, ҳушини йўқотган сингил бир неча соатдан сўнг яшаш хонадонида вафот этган.
Суд судланувчига жазо тайинлашда жиноий қилмишидан пушаймонлиги, муқаддам судланмагани, яшаш жойидан ижобий тавсифлангани, оилавий шароити, қарамоғида 2 нафар фарзанди борлиги, жабрланувчи қонуний вакилининг даъвоси йўқлиги, жазони оғирлаштирувчи ҳолат аниқланмагани, оиласининг ва вояга етмаган фарзандларининг бошқа боқувчиси йўқлиги каби омилларни инобатга олди. И.М. Жиноят Кодексининг 104-моддаси («Қасддан баданга оғир шикаст етказиш») 3-қисми «д» банди билан айбли деб топилди. Унга Жиноят Кодексининг 57-моддаси (енгилроқ жазо тайинлаш)га асосан 5 йил муддатга озодликдан маҳрум қилиш жазоси тайинланди. Тарафларга апелляция ва кассация тартибида шикоят бериш ҳуқуқи тушунтирилди.
Аввалроқ Фарғона вилояти Фурқат туманида 1986 йилда туғилган фуқаро ўзининг 24 ёшли синглисини уриб, ўлдириб қўйгани ҳақида хабар берилган эди.
Изоҳ (0)