Ўзбек лимончилигининг асосчиси, халқ селекционери Зайниддин Фахриддинов томонидан яратилган лимонзор бир пайтлар мамлакат боғдорчилигининг кўркига айланганди. Шу боис Ўзбекистонга келган меҳмонлар, жумладан, олий мартабали меҳмонлар ҳам, Қибрай туманидаги ўша машҳур лимонзорга тез-тез ташриф буюрган, дея ҳикоя қилади «Халқ сўзи».
— Меҳмонларни кутиб олишда синглим иккаламиз доим иштирок этардик, — дея эслайди фахрий академик Зайниддин Фахриддиновнинг қизи, қишлоқ хўжалиги фанлари номзоди Раъно Хўжаева. — Биз учун бу жараён байрамона тус оларди. Эгнимизда атлас кўйлак, сочларимиз чиройли турмакланган... Синглим меҳмонларга нон-туз олиб чиқса, мен уларнинг қўлларига гулдасталар тутқазардим.
Лимонзорга фазогир Владимир Жонибеков тез-тез келарди. У фазога олиб чиқилган ўзбек лимонини биринчи бўлиб татиб кўрганини тўлқинланиб гапириб бергани ҳалиям кўз ўнгимда.
— Айтишларича, Брежнев лимонзорда ҳушидан кетган экан. Шу ростми?
—Ўша ташриф кечагидек эсимда. Брежнев лимонзорга Шароф Рашидов ҳамроҳлигида кириб келганди. Машинадан тушиб, шу ерда йиғилиб турганлар орасидан отам билан қўл бериб кўришди-да, ўзаро суҳбатлашганча иссиқхонага кириб кетишди. Бир маҳал Брежнев бўшашган алфозда чиқиб келди. Унинг мазаси қочган эди, аммо ҳушидан кетмаганди. Ўша заҳоти кимдир югуриб бориб, битта стул олиб келди. Брежнев ўша стулда бир оз тин олгандан сўнг ўзига келди.
Фикримча, айримлар ўйлаганидек, унга иссиқхонанинг иссиқ ва нам ҳавоси эмас, аксинча, лимон гуллари кўпроқ таъсир қилган. Чунки ўшанда лимонлар ғуж-ғуж гуллаган эди. Бу пайтда жуда кўп миқдорда эфир мойлари ажралиб чиқади. Унинг ўткир ва хуш бўйи ҳар қандай кишини гангитиб қўйиши мумкин. Лимон гули таркибида эфир мойлари ниҳоятда кўп бўлади. Шунинг учун у косметика саноатида ўта қадрланади.
Маълумот учун, Зайниддин Фахриддинов томонидан «Золотое яблоко», «Тошкент», «Мейр» каби лимон навлари яратилган бўлиб, улар серҳосиллиги, мевасининг йириклиги, ўзгача мазаси билан ажралиб туради.
Изоҳ (0)