Жорий йилнинг 1-ярим йиллигида сертификатлаштириш ишлари натижасида жами 60 миллиард 270 миллион 604 минг сўмлик маҳсулот яроқсиз деб топилди. Бу ҳақда «Ўзстандарт» агентлиги матбуот хизмати хабар бермоқда.
Шундан, яроқсиз деб топилган импорт маҳсулотлар 33 миллиард 802 миллион 745 минг сўмни, маҳаллий ишлаб чиқарувчилар томонидан ишлаб чиқарилган маҳсулотлар 23 миллиард 652 миллион 537 минг сўмни ва инспекция назорати натижасида аниқланган яроқсиз маҳсулотлар 2 миллиард 815 миллион 322 минг сўмни ташкил этди.
Яроқсиз импорт маҳсулотлар давлатлар кесимида таҳлил қилинганида Хитой (13 миллиард 731 млн 674 минг сўмлик машинасозлик, электротехника маҳсулотлари), Россия (11 миллиард 762 миллион 803 минг сўмлик машинасозлик ва озиқ-овқат маҳсулотлари) ва Ҳиндистон (4 миллиард 110 миллион 255 минг сўмлик дори воситалари) давлатларининг маҳсулотларига тўғри келмоқда.
Ушбу яроқсиз деб топилган маҳсулотларнинг асосий қисми машинасозлик ва металл маҳсулотлари (39 миллиард 587 миллион 372 минг сўмлик), дори ва дори воситалари (17 миллиард 177 миллион 776 минг сўмлик) ва озиқ-овқат маҳсулотларидан (3 миллиард 323 миллион 337 минг сўмлик) иборат.
Изоҳ (0)