Самарқанд шаҳар «Сўғдиёна» массивидаги Абу Бакр Розий номли кўча ўтган йили йўлчилар томонидан қайта таъмирланган эди. Мана 4 ойдирки шу кўчанинг қоқ марказидан ўтувчи тоза ичимлик суви қувурлари ёрилиб, равон йўллар яна эски ҳолатига келиб қолган, деб хабар бермоқда «Дарё мухбири Фарҳод Норбўтаев.
«Ушбу сув қувурининг ёрилганига 4 ой бўлди. Ўтган шунча вақт мобайнида беҳудага оқиб ётган сув ҳеч кимни ташвишга солмаяпти. Айтмаган одамимиз, мурожаат қилмаган эшигимиз қолмади. Катта сунъий тарзда пайдо бўлган ҳовуз ахлатхонага айланди. Бу ердан оқиб чиқаётган тозза ичимлик сувидан биз фойдаланамиз», — дейди «Янги обод» маҳалласида яшовчи Шаҳноза Абдурашидова.
«Янги обод» маҳалласидаги сув қувурининг ушбу ҳолатга келиб қолиши натижасида маҳаладаги 16-17-18-кўп қаватли уйлар, шунингдек 39-умумтаълим мактаби атрофи ачинарли аҳволга келиб қолган. Сунъий тарзда ташкил этилган ҳовуз турли хил чиқиндилар билан тўлдирилиб ташланаётгани ҳам иккинчи муаммони юзага келишига сабаб бўлмоқда.
«Ичадиган сувимиз ҳам ифлосланган. Ноиложликдан шу сувдан фойдаланмоқдамиз. Оддий одам оқиб турган сувга гилам ёки автомашина ювса катта миқдорда жарима солишади. Телевизорда сувни исроф қилмаслик бўйича турли эълонлар берилади. Аммо тўрт ойдан бери ҳар куни тонналаб оқиб кетаётган сувнинг исроф бўлаётганлигига ким жавоб беради? Икки кун олдин келганингизда бу ердан оқиб чиққан сув катта кўл ҳосил қилганлигига ўзингиз гувоҳ бўлардингиз. Ким ўтса чиқинди ташлаб кетадиган жой бўлиб қолди», — дейди Шаҳноза Абдурашидова.
Маҳаллий аҳолининг айтишича, ушбу кўчада таъмирлаш ишлари олиб борилаётганда сув қувурлари нотўғри қўйилган. Натижада йўлнинг айрим қисмлари чўккан. Кўчанинг қоқ марказида «қайнар булоқ»нинг юзага келишида ҳам қувурнинг нотўғри жойлашиши сабаб бўлган. Шаҳар сувоқова ташкилоти наҳотки шу ҳолатдан бехабар бўлса? Улар шунчалик ҳам ўз вазифаларига маъсулиятсизми? Уларни назорат қиладиган мутасадди ташкилотлар қаерга қараяпти?
Ўйлаймизки, тез кунларда Самарқанд шаҳар ҳокимлиги томонидан Абу Бакр Розий кўчасидаги ҳолат атрофлича ўрганилиб, мавжуд муаммо ўз ечимини топади. «Дарё» интернет нашри Абу Бакр Розий кўчасидаги тоза ичимлик сувига бўлган эътиборсизлик ҳолатини кузатиб боради ва кўрилган чоралар бўйича маълумот беради.
Изоҳ (0)