Ҳарбий хизматчиларнинг фарзандлари ёзги таътилни қандай ўтказмоқда?

Мудофаа вазирлигига қарашли оромгоҳларда ҳарбий хизматчиларнинг фарзандлари ёзги таътилни мазмунли ўтказишлари учун турли кўнгилочар тадбирлар ҳамда спорт мусобақалари ўтказиб келинмоқда. Бу ҳақда Мудофаа вазирлиги матбуот хизмати «Дарё»га хабар берди.

Жумладан, Бухоро шаҳридаги «Ёш қурувчи», «Бунёдкор», «Ниҳол», Хоразм вилоятидаги «Нилуфар», Самарқанддаги «Ё.Турсунов» номидаги соғломлаштириш оромгоҳларида ҳарбий хизматчиларнинг фарзандлари мароқли ҳордиқ чиқаришлари учун барча шароитлар яратилган.

Тошкент вилоятидаги «Тонг» оромгоҳида болажонларнинг кўнгилли дам олишлари учун тадбирлар режаси ишлаб чиқилган. Ушбу режага биноан, деярли ҳар куни оромгоҳда турли интеллектуал ўйинлар, спорт мусобақалари, учрашувлар ва давра суҳбатлари ўтказилмоқда.

Соғломлаштириш марказига ташриф буюрган болакайлар «Мамлакатда болалар соғломлаштириш оромгоҳларини ташкил қилиш, сақлаш ва тартибга солишнинг санитария қоидалари» талабларига жавоб берадиган нормалар асосида овқатланмоқда.

«Ошхонамизда ауцорсинг тизими жорий қилинган. Биласиз, тажрибадан ўтган тизим бу. Энг муҳими овқатларимиз болаларга манзур. Янги овқат пиширадиган печлар, нон маҳсулотлари печи, озиқ-овқатни сақлаш учун алоҳида музлаткичлар сотиб олдик. Яъни идиш-товоқлардан тортиб, қозонларгача янгиладик. Бу эса ошхона хизматининг сифат жиҳатдан барча талабларга жавоб беришини таъминлайди. Таом пишириш жараёнида ходимларимиз тозаликка катта эътибор беради. Чунки тозалик қатъий назорат остида.

Ҳар куни оромгоҳнинг санитар шифокори маҳсулотларга ишлов беришдан тортиб қозонга солинишигача, идишларнинг ювилишидан тортиб, дизинфекция қилинишигача назорат қилади. Белгиланган меъёр бўйича болаларга кун давомида олти маҳал овқат берилади. Уларнинг овқатланиш рационидан тухум, сут, сарёғ, пишлоқ ва гўшт каби оқсилга бой маҳсулотлар ва витанминга бой мевалар ўрин олган. Биз овқат пиширишда болаларнинг хоҳиш-истагини ҳам инобатга оламиз. Яна таомномада миллий таомларга ҳам алоҳида ўрин ажратилган», – дейди ошхона бошлиғи, «Канзас элит савдо» фирмаси раҳбари Дилфуза Абдуллаева.

Эслатиб ўтамиз, «Тонг» ҳамда «Ё.Турсунов» болалар соғломлаштириш маскани мавсум олдидан қайта таъмирланиб, фойдаланишга топширилган эди.