Антарктида устидаги 2017 йилда ёпилган озон қатлами тешиги кузда яна пайдо бўлади, бироқ 2040 йилга бориб сезиларли даражада «озиши» мумкин. Бу ҳақда Россиянинг Бутунжаҳон ёввойи табиат жамғармаси дастури раҳбари Алексей Кокорин «РИА Новости»га маълум қилган.
Аввалроқ Европа космик агентлиги Антарктида ҳудудининг ярмини эгаллаган озон қатлами тешиги 2017 йил 26 ноябрда ёпилганини маълум қилган. Мазкур маълумотлар Европанинг Centinel-SP космик аппаратидан олинган.
Кокориннинг айтишича, озон тешигининг сўнгги бир неча ўн йилликдаги статистикаси унинг кичраяётгани ва 2040 йилга бориб унинг ўртача ўлчами 1970 йилдаги ўлчамга тенг бўлишини кўрсатган.
Унинг сўзларига кўра, Антарктида устидаги озон туйнуги ҳар йили тахминан сентябрь ойидан ноябргача, ҳаво жуда совуқ, бироқ қуёш нури бор пайтда юзага келади.
Экспертнинг қайд этишича, гап озон туйнугининг умуман бўлмагани ҳақида кетмаяпти, масала унинг географик миқёсида, озоннинг 18—22 километр баландликдаги концентрациясида. Туйнукнинг ўзи аввал ҳам бўлган, ҳозир ҳам бор, бундан кейин ҳам бўлади.
Изоҳ (0)