Венерага муваффақиятсиз тарзда учирилган совет станцияси яқин йиллар ичида Ерга қулайди, деб ёзади «Газета.ru» астроном, космонавтика тарихчиси Павел Шубинга таяниб.
Унинг аниқлик киритишича, 1972 йилнинг 27 мартида коинотга «Венера-8» станцияси жўнатилган. 31 март куни собиқ иттифоқ унинг «эгизаги»ни учиришга уриниб кўрган, бироқ тезлатувчи блок ишлайдиган босқичда носозлик юз бериб, двигатель ўчиб қолган. Станция тезлатувчи блок билан бирга Ерга яқин орбитада қолиб кетган. Муваффақиятсизликни яшириш учун, қурилма «Венера-9» ўрнига, «Космос-482» деб ном олган. Ўз навбатида «Венера-8» Венера юзасига қўнган ва дунёда биринчи марта унинг юзасидан илмий маълумот узатган.
«Космос-482» бизга яқин 4—7 йил ичида қайтиб келади», — деди Шубин.
Унинг сўзларига кўра, парвоздан кейин станция тезлатувчи блок билан бирга 220 километрга 9800 км параметрли орбитада қолган, ўтган ярим аср ичида қарийб 7400 километрни йўқотган, апогей (орбитанинг энг юқори нуқтаси) 2400 километргача пасайган.
Шубиннинг сўзларига кўра, ҳозирча станция қаерга қулаши номаълум, аммо бу 52 даража шимолий ва 52 даража жанубий кенглик оралиғида бўлади.
Изоҳ (0)