Сурхондарё вилояти ҳокими лавозимида ишлаб келган Эркинжон Турдимов Самарқанд вилояти ҳокими этиб тайинланди. Бу ҳақда Ўзбекистон ҳукуматидаги манбага таяниб, «Газета.uz» хабар берди.
49 ёшли Турдимов 2016 йилнинг декабрь ойидан буён Сурхондарё вилояти ҳокими лавозимида ишлаб келаётганди.
Бунгача у 1991 йилдан 1995 йилгача «Ўзсаноатқурилишбанк»нинг ҳудудий бўлимларида фаолият кўрсатган. 1995—1996 йилларда Зарафшон шаҳар ҳокими ўринбосари, 1996 йилдан 2000 йилгача Ташқи иқтисодий фаолият Миллий банкининг Навоий бўлимида бошқарувчиси сифатида ишлаган. 2000 йилдан 2008 йилгача эса Хатирчи тумани ҳокими бўлган.
2008 йилда Қишлоқ ва сув хўжалиги вазирининг биринчи ўринбосари лавозимида фаолият кўрсатган Турдимов ўша йили Навоий вилоят ҳокими лавозимига тайинланганди. У Сурхондарё вилояти ҳокими бўлгунига қадар Навоийда фаолият кўрсатган.
Шу кунгача Самарқанд вилояти ҳокими сифатида ишлаб келган Туробжон Жўраев қайси вазифага ўтгани ҳозирча маълум эмас.
Изоҳ (0)