Ер орбитасида 8 минг тонна чиқинди йиғилгани аниқланди, деб ёзмоқда Hi-Tech Mail.Ru.
Илк сунъий йўлдошлар учирилганидан буён ер орбитасида чиқинди йиғилиб келади. Ҳозирги кунда Ер атрофида космик чиқиндилар сирасига киритиш мумкин бўлган 13 мингга яқин объект айланади. Ракета синиқлари ва сунъий йўлдошлар қолдиқлари шу қадар тезликда кўпаймоқдаки, яқин орада инсониятнинг Ер орбитасидан ташқарига чиқиши қийинчилик туғдирадиган бўлиб қолади.
Дунё бўйлаб олим ва муҳандислар ушбу муаммони ҳал қилиш йўлларини изламоқда. Буюк британияликлар орбитани тозалайдиган қурилма учирмоқчи, Украина ва Шотландия олимлари эса ўзидан чиқинди қолдирмайдиган ракеталарни ишлаб чиқиш устида иш олиб бормоқда. Россия Фанлар академиясида Ер орбитасини тозалаш бўйича махсус йўналишнинг очилиши кутилмоқда.
2019 йили Россияда космик чиқиндилар муаммосига бағишланган конференция ўтказилиши режалаштирилган. Асосий муаммо шундан иборатки, Ердан 600 километрдан узоқроқ масофадаги чиқиндиларни бартараф қилишнинг самарали йўли топилмаган.
«Яхшиси чиқиндиларни камайтириш бўйича тавсияларга қатъий амал қилинишига эришиш керак. Орбитага ракета ва йўлдош учириш ҳеч қачон тўхтамайди ва бу доимий равишда ана шундай муаммоларни келтириб чиқаради…», — дейди Россия Фанлар академияси астрономия институти директори Борис Шустов.
Изоҳ (0)