Yer orbitasida 8 ming tonna chiqindi yig‘ilgani aniqlandi, deb yozmoqda Hi-Tech Mail.Ru.
Ilk sun’iy yo‘ldoshlar uchirilganidan buyon yer orbitasida chiqindi yig‘ilib keladi. Hozirgi kunda Yer atrofida kosmik chiqindilar sirasiga kiritish mumkin bo‘lgan 13 mingga yaqin obyekt aylanadi. Raketa siniqlari va sun’iy yo‘ldoshlar qoldiqlari shu qadar tezlikda ko‘paymoqdaki, yaqin orada insoniyatning Yer orbitasidan tashqariga chiqishi qiyinchilik tug‘diradigan bo‘lib qoladi.
Dunyo bo‘ylab olim va muhandislar ushbu muammoni hal qilish yo‘llarini izlamoqda. Buyuk britaniyaliklar orbitani tozalaydigan qurilma uchirmoqchi, Ukraina va Shotlandiya olimlari esa o‘zidan chiqindi qoldirmaydigan raketalarni ishlab chiqish ustida ish olib bormoqda. Rossiya Fanlar akademiyasida Yer orbitasini tozalash bo‘yicha maxsus yo‘nalishning ochilishi kutilmoqda.
2019-yili Rossiyada kosmik chiqindilar muammosiga bag‘ishlangan konferensiya o‘tkazilishi rejalashtirilgan. Asosiy muammo shundan iboratki, Yerdan 600 kilometrdan uzoqroq masofadagi chiqindilarni bartaraf qilishning samarali yo‘li topilmagan.
“Yaxshisi chiqindilarni kamaytirish bo‘yicha tavsiyalarga qat’iy amal qilinishiga erishish kerak. Orbitaga raketa va yo‘ldosh uchirish hech qachon to‘xtamaydi va bu doimiy ravishda ana shunday muammolarni keltirib chiqaradi…”, — deydi Rossiya Fanlar akademiyasi astronomiya instituti direktori Boris Shustov.
Izoh (0)