ИИВ ижтимоий тармоқларда тарқалган Каттақўрғон шаҳрида бир аёлнинг таҳқирланиши билан боғлиқ видеодаги «салбий ҳолатлар» ўз ходими томонидан содир этилганини тан олиш баробарида иккинчи аёлнинг таҳқирланишини яширмоқда. Бу ҳақда «Дарё» мухбири Фарҳод Норбўтаев фикр юритган.
Бош прокуратура ахборотида таҳқирланган аёл ушбу ҳодиса юзасидан 22 июнь куни (воқеа юз берганидан 19 кун ўтиб) ваколатли органга ариза билан мурожаат қилгани айтиб ўтилган. Аслида эса жабрланувчи аёл томонидан ариза ёзилмаган. Аксинча, аёл Санъат Умаровга нисбатан ҳеч қандай даъвоси йўқлигини билдириб, Каттақўрғонда икки боласидан бошқа ҳеч кими йўқлиги, улар билан душманлашса, ўзига, болаларига зиён етишидан қўрқишини таъкидлаб, ҳеч қаерга шикоят қилмаган.
Ажаблантирадиган жиҳати шундаки, ушбу видео тарқалгунга қадар на Каттақўрғон шаҳар ИИБ, на прокуратура томонидан Санъат Умаровга нисбатан ҳеч қандай чора кўрилмаган. Аксинча, жабрланувчи Н.Т.ни шикоят қилмаслигидан фойдаланиб, мутасадди вакиллар ИИБ ходими ўз ишини давом эттириши учун рухсат берган.
Ушбу видео «Озодлик» радиоси орқали ижтимоий тармоқларда тарқалганидан сўнг, собиқ ИИБ ходимига нисбатан зудлик билан жиноий иш очилган. Прокуратуранинг бундай иш тутишига сабаб нима деган савол туғилиши мумкин. Бунга ижтимоий тармоқларда фақат овози чиқиб турган, бироқ шу кунгача ҳеч ким эътибор қаратмаётган иккинчи ҳолатдаги ИИБ ходими сўроғида бўлган аёлнинг «ҳикоялари» аниқлик киритади.
Хўш, бу аёл ким? Нега у ҳеч қаерда тилга олинмаяпти? Прокуратуранинг ушбу видеодаги иккинчи ҳолатга эътибор қаратмаслигининг сабаби нимада? Нима сабабдан бир вақтнинг ўзида бўлган иккинчи ҳолат юзасидан ИИВ ҳам, прокуратура ҳам ҳеч қандай муносабат билдирилмаяпти? Нега ҳамма жабрланувчи аёл ҳақида гапириб, аслида ушбу қабиҳликка йўл қўйиб берган Каттақўрғон шаҳар ИИБ ва унинг мутасадди раҳбарлари ҳақида фикр юритмаяпти?
«Дарё» мухбири олиб борган суриштирувларга кўра, жорий йилнинг 25 май куни Каттақўрғон шаҳар тиббиёт бирлашмаси биносида Ф.Ш. исм-шарифли аёл (айтишларича, у ўша куни маст ҳолда бўлган) можаро кўтариб, бино ойналарини синдирган. Н.Т. билан бўлган воқеа куни у ҳам Каттақўрғон шаҳар ИИБ бўлимига олиб келинган ва таҳқирланган. ИИБ ходимлари Ф.Ш.ни ўша куни нафақат таҳқирлаган, балки урган ҳам.
Кўз олдида ўзига ўхшаган ожиза аёлни таҳқирланиши, калтакланишини кўрган Н.Т. қўрққанидан ҳам ихтиёрий равишда ечинишга мажбур бўлган. Яна бир ҳолат шуки, Каттақўрғон шаҳрида аёл киши билан боғлиқ жиноятларда Н.Т. каби муқаддам судланган аёллар доимий тарзда чақирилган ва улар ҳар сафар келганида кийимлари ечинтирилган. Муқаддам, икки бор жиноий жавобгарликка тортилган Н.Т. ИИБ ходимларининг бу ишлари одатий эканлиги, қаршилик кўрсатиш бефойдалигини билиб, Санъат Умаровнинг буйруқларини индамай бажарган.
Кишини ёқа ушлашга мажбур қиладиган жиҳати шундаки, ўша куннинг ўзида Н.Т. бир эмас, балки бир неча бор ечинтирилган. Санъат Умаровнинг аёл кишини ечинтириб, уни таҳқирлаганига аввалига ҳеч ким ишонмаган. Шундан сўнг собиқ ИИБ ходими сўзини исботлаш мақсадида ушбу ҳолатни такрорлаб, видеога олган.
Негадир ушбу воқеадан сўнг ҳамма фақат ечинган аёл ҳақида сўз юритиб, ушбу нохуш ҳолатга сабабчи бўлган ички ишлар ходимлари ҳақида лом-лим демаяпти. Прокуратура ҳам Санъат Умаровга нисбатан чора кўрилиши билан чекланмоқда, холос. Аслида эса ушбу ҳолат Каттақўрғон шаҳар ИИБ биринчи ўринбосарининг шундоққина хонаси олдида содир бўлган ва бевосита унинг ўзи ҳам томошабин сифатида воқеани кузатган. Бутун бошли бўлимда ялонғоч бўлиб юрган аёлга ИИБнинг бирор ходими эътибор қаратмаган.
Қайд этиш жоизки, милиция ходими томонидан таҳқирланган аёл видеоси «Озодлик» радиосига етиб боришига Санъат Умаровнинг жазмани эмас, балки рафиқаси сабаб бўлган. Маълумотларга кўра, ушбу видеодан хабардор бўлган собиқ ИИБ ходимининг жазмани унинг рафиқасига қўнғироқ қилиб, ундан рашк қилган эри бошқа аёлларни ечинтириб юришини билдирган. Аламзада аёл эса видеони бутун дунёга тарқатиб юборган.
Воқеаларнинг батафсил таҳлили учун ҳозирча сир сақланаётган Ф.Ш. сўроқ қилиниши ва унга нисбатан амалга оширилган зўравонликларга ҳам баҳо берилиши лозим. Бу ҳозирда олиб борилаётган текширув ва тергов ишларига янада аниқлик киритади.
Изоҳ (0)