Болгариянинг Бургас шаҳрида 1—6 июль кунлари ўтказилган мактаб ўқувчилари ўртасидаги математика бўйича халқаро мусобақада ўзбекистонлик ўқувчилар 1 та олтин, 2 та кумуш ва 2 та бронза медални қўлга киритди. Бу ҳақда Халқ таълими вазирлиги матбуот хизмати маълум қилди.
Мактаб ўқувчиларининг Халқаро математика мусобақаси (International Mathematics Competition) дунёнинг иқтидорли ўқувчилари учун энг катта ва муҳим форум ҳисобланиб, ҳар йили июль ойида ўтказиладиган мусобақада дунёнинг 30 га яқин мамлакатидан келган 600 нафардан ортиқ иқтидорли ўқувчилар ўзаро беллашади.
Мазкур нуфузли мусобақада бешинчи марта иштирок этган Ўзбекистон терма жамоаси мусобақада иштироки тарихида илк маротаба умумжамоа ҳисобида энг кўп медални олишга муваффақ бўлди.
Бухоро вилояти Қоракўл туманидаги 1-ИДУМнинг 8-синф ўқувчиси Дониёр Исмоилов олтин медални қўлга киритди. Ушбу мактабнинг 7-синф ўқувчиси Лазизбек Ражаббоев ва Пешку туманидаги 18-мактабнинг 9-синф ўқувчиси Жаҳонгир Норбоев кумуш медаль, Термиз шаҳридаги 4-ихтисослаштирилган мактаб-интернатнинг 7-синф ўқувчиси Искандар Бўриев, Учтепа туманидаги 4-мактабнинг 7-синф ўқувчиси Муҳаммадризо Мажидов бронза медалга сазовор бўлди.
Изоҳ (0)