Калининградда ўзбек аскарининг 73 йил олдин йўқотган қошиғи топилганлиги ҳақида хабар берган эдик. Мазкур хабардан сўнг «Дарё» таҳририятига Самарқанд вилояти Пайариқ туманидан мурожаат қилиб, Жайнак Холматовнинг яқинлари ҳақида маълумот беришди. «Дарё» мухбири Фарҳод Норбўтаев Жайнак Холматовнинг яқинлари билан учрашди.
Пайариқ тумани ҳозирги Кўктепа маҳалласи (аввалги Ҳуррият колхози) Чандир қишлоғига бордик. Бу ерда бизни Жайнак Холматовнинг жияни Бахтиёр Балқиев кутиб олди. 1950 йилда туғилган Бахтиёр ака Жайнак Холматовнинг синглиси Иқбол Холматованинг фарзандлари бўларкан. Оилада катта фарзанд бўлган Бахтиёр ака тоғалари ҳақида фақат онаси айтиб берган хотираларнигина эслай олишини айтиб ўтди.
— Жайнак тоғам ҳақида фақат онам худо раҳматлининг айтганларини айтиб бера оламан. Тоғам Жайнак Холматов 1942 йилда урушга кетган. Урушга киргунга қадар онам билан хат ёзишиб турган. 1944 йилда «Биз урушга киряпмиз» деган хат келган. Бу тоғамнинг энг сўнгги хати бўлган. Шундан сўнг ҳеч қандай хат келмаган деб айтиб берарди онам, — дея хотирлаб ўтди Бахтиёр Балқиев. — Улар оилада икки ўғил, икки қиз бўлган. Онам 1925 йилда туғилган. Онамнинг айтиб беришича, 1923 йилда Жайнак тоғамиз, 1920 ёки 1921 йилда Қўшбоқ тоғамиз туғилган. Энг кенжа сингиллари Холжон Холматова 1928 йилда туғилган.
Бахтиёр Балқиевнинг билдиришича, қошиқда ёзилган Бурқут посёлкаси эмас, балки Бурқут почта хизмати ҳисобланган. Ўша вақтда юборилган ҳамма хатлар шу ном остида келган.
— Жайнак тоғам ҳақида ҳатто Россиядан ҳам телефон қилиб сўрашди. Тоғаларимнинг шарифи (отчествоси) бўлмаган. Колхозимиз номи Ҳуррият бўлган. Бурқут посёлка бўлмаган. Бурқут почта хизмати бўлган, — дейди Бахтиёр ака.
Ушбу қишлоқда яшовчи 1936 йилда туғилган Муртоз бобо Қодировнинг айтишича Жайнак Холматов урушга кетганда 17 ёшда бўлган. Ҳали оила қурмаган йигит ўз хоҳиши билан урушга кетган. 82 ёшли Муртоз бобо Жайнак Холматов билан ака-укаларнинг фарзандлари эканлигини таъкидлаб ўтди. Суҳбат чоғида Муртоз бобонинг биринчи берган саволи «Жайнак акамнинг қабри топилдими?» деган савол бўлди.
— Бизлар беш ака-уканинг фарзандлари битта ҳовлида турардик. Амакиваччаларим Қўшбоқ, Жайнак, Иқбол ва Холжонлар отамнинг қўлларида катта бўлишган. Отам колхоз раиси эди. Жайнак акам 4—5 ёшлар бўлганимда аравачага солиб судраб юрганларини эслайман. Ўша даврларда туғилганлик гувоҳномаси жуда кеч бериларди. Фаслларга ёки бўлмасам пишиқчиликка қараб туғилган кунини ёзиб қўйишарди. Урушга бораман деган йигитларнинг ёши етмаса, улар ёшини катта қилиб кўрсатишган. Жайнак акам ҳам 17 ёшида урушга кетди, — деб хотирлайди Муртоз бобо Қодиров.
Жайнак Холматов урушга кетган вақтларида ёш йигит бўлган. Оиласи бўлмаган. У кишининг синглиси Иқбол Холматованинг 10 нафар, Холжон Холматованинг эса 6 нафар фарзандлари бўлган. Жайнак Холматовнинг жияни Бахтиёр Балқиевнинг ҳам 10 нафар фарзанди бор.
Изоҳ (0)