Кенияда ёнғин оқибатида 15 киши ҳалок бўлди

28 июнь, пайшанба куни эрталаб Кениянинг пойтахти Найроби шаҳридаги Гикомба бозорида йирик ёнғин юз берди, деб ёзмоқда «Интерфакс».

Гикомба Шарқий Африкадаги энг йирик очиқ бозор ҳисобланади.

Ёнғин натижасида 15 киши, шу жумладан, болалар ҳалок бўлган. 70 киши турли даражада жароҳат олган.

Маълум қилинишича, ёнғин сабаблари ҳали аниқланмаган. Ҳукумат вакиллари берган маълумотларга қараганда, бу каби ёнғинлар кўпинча электр симларининг носозлиги туфайли келиб чиқади.

Воқеа жойида тирик қолганларни қидириш ишлари давом этмоқда. Қутқарувчиларнинг сўзларига қараганда, бозорда овқат тайёрлаш учун ишлатиладиган газ баллонлари доимий равишда портлаб, уларнинг ишини мураккаблаштирмоқда.