Британия ҳукумати Трамп ва Путиннинг учрашуви юзасидан хавотири сабабини тушунтирди
Буюк Британия ҳукумати АҚШ президенти Дональд Трампнинг Россия етакчиси Владимир Путин билан бўлғуси учрашуви юзасидан хавотир билдирмоқда, чунки АҚШ раҳбари нима ҳақда гапиришини ҳеч ким олдиндан била олмайди. Бу ҳақда Bloomberg Буюк Британия вазирлар маҳкамасидаги манбасига таяниб хабар берди, деб ёзади «Газета.ru».
Манбалардан бири айтишича, Трампнинг гап-сўзлари НАТО мамлакатлари ва Россия ўртасидаги чегараларда кескин вазият юзага келишига олиб келиши мумкин, у ерда, шу жумладан, Британия қўшинлари ҳам жойлашган.
Яна бир манбанинг таъкидлашича, Трамп музокараларда тилга оладиган мавзуларни олдиндан айтиш доим қийин. Америка президентининг қўққисдан бўладиган гап-сўзлари унинг Британия ҳукумати билан музокаралари чоғида ҳам намоён бўлган эди.
Аввалроқ АҚШ вице-президенти Майк Пенс Америка етакчиси Дональд Трамп Россия президенти Владимир Путин билан учрашувда қандай мавзуларни кўтаришини маълум қилган эди.
