Каттақўрғонда Хитой билан ҳамкорликда вольфрам, молибден ва мис қазиб олиш бўйича янги лойиҳа амалга оширилади
Ўзбекистон Республикаси Давлат геология ва минерал ресурслар қўмитаси таклифига кўра юртимизга ташриф буюрган Хитойнинг «Синьян» илмий-савдо компанияси, оғир-механика саноати йўналишида фаолият кўрсатувчи CITIC компанияси, Хэнан провинциясидаги кўмир саноати институти, тоғ-кон металлургия саноати йўналишидаги Хэнан Голун компанияси раҳбар ва муҳандислари Каттақўрғон шаҳридаги Ингичка қўрғонидаги собиқ «Ингичка кони» акциядорлик жамияти участкаларида волфрам, молибден ва мис қазиб олиш бўйича лойиҳани амалга ошириш юзасидан дастлабки ўрганиш ишларини олиб борди, деб хабар берада «Дарё» мухбири Фарҳод Норбўтаев.
Самарқанд вилояти ҳокимлигида Хитойнинг Синьцзян провинциясидаги «Синьян» илмий-савдо компанияси президенти Сунь Чженцзюн бошчилигидаги делегация аъзолари билан бўлиб ўтган учрашувда ҳам делегация раҳбари Сунь Чженцзюн ўрганиш хулосалари асосида Каттақўрғон шаҳридаги Ингичка қўрғонида мавжуд иккита шахтадан фойдаланиш ва қўшимча янги кон шахталарини қуриш имконияти мавжудлигини таъкидлади.
Хорижлик инвесторлар гуруҳи билан ўтказилган мулоқотда, Ингичкада тоғ-кон металлургия саноати йўналишидаги лойиҳани амалга ошириш ҳамда қўрғонда коммуникация тармоқлари ҳолатини яхшилаш, инфратузилма объектлари қуриш учун Хитой томонидан 50-55 миллион доллар миқдорида тўғридан-тўғри инвестиция жалб қилиниши белгилаб олинди. Босқичма-босқич амалга ошириладиган лойиҳа натижасида 500 тадан 700 тагача янги иш ўрни яратилади.
Маълумот учун 2017 йилда икки давлатлар ўртасидаги товар айирбошлаш ҳажми 5 миллиард доллардан ошган. Айни пайтда биргина Самарқанд вилоятининг ўзида Хитой капитали иштирокида 30 дан ортиқ қўшма корхона фаолият кўрсатмоқда. Мазкур корхоналар томонидан қурилиш материаллари, енгил саноат, пойабзал, кимё маҳсулотлари, қадоқлаш материаллари, мотороллерлар ва бошқа турдаги маҳсулотлар ишлаб чиқарилади.
