Мудофаа вазирлиги ҲАН инспекцияси Халқаро армия ўйинларига тайёрланмоқда

Чирчиқ гарнизонида Ўзбекистон Мудофаа вазирлиги Ҳарбий автомобиль назорати (ҲАН) инспекцияси томонидан жорий йилнинг август ойида ўтказиладиган Халқаро армия ўйинларининг «Йўл патрули» мусобақасида иштирок этувчи жамоа пухта тайёргарлик кўрмоқда. Бу ҳақда Мудофаа вазирлиги матбуот хизмати «Дарё»га хабар бермоқда.

Таъкидлаш керакки, 2017 йилда ўтказилган учинчи Халқаро армия ўйинларининг «Йўл патрули» танловида биринчи марта иштирок этган Ўзбекистон Мудофаа вазирлиги ҲАН инспекцияси ҳарбий хизматчилари учинчи ўринни эгаллаган эди.

«Тайёргарлик дастури доирасида хайрли ишга қўл урилди. Яъни ҲАН инспекцияси ташаббуси билан Чирчиқ шаҳрида хизмат бурчини бажариш вақтида ҳалок бўлган ҳарбий хизматчиларнинг яқинлари ҳолидан хабар олинди. Шундан сўнг Мудофаа вазирлиги ҲАН ходимлари билан ўқув йиғини ташкил этилди. Унда истиқболдаги режалар, ҳарбий автомобилларнинг хавфсиз ҳаракатини таъминлаш чоралари, бартараф этилиши керак бўлган камчиликлар ҳамда АрМИ-2018 доирасида ўтказиладиган «Йўл патрули» халқаро мусобақасига тайёргарлик кўриш жараёни билан боғлиқ бўлган масалалар хусусида вазифалар белгиланди», — дейилади хабарда.

Йиғиндан сўнг «Чирчиқ» полигонида «Йўл патрули» мусобақаси иштирокчилари саралаш синовларидан ўтказилди. Танлов шартларига кўра, мусобақа қатнашчиси шахсий қурол ва бронежилет кийиб, махсус автомобиль ёрдамида 3700 метрдан иборат бўлган хавфли бурилиш, қиялик, экстремал эстакада ва ишора кўрсаткичлари билан ажратилган йўлакдан ҳаракатланди (икки марта ўтилади). У белгиланган ҳудудда тўхтаб, турли усулларда нишонга қарата пистолетдан (иккинчи маротаба автоматдан) ўқ узди. Кейин темир йўл кесишмасидан ўтиб, беморга биринчи тиббий ёрдам кўрсатди. Ҳудди шу тартибда яна ҳаракатланиб, юзага келган ёнғинни бартараф этди. Жамоаларнинг уч нафар аъзоси мазкур масофани якка тартибда босиб ўтган бўлса, қолган икки нафари (улардан бири жамоа сардори) автомобилда техник меъёрларни бажарди.

Танловнинг якуний натижаларига кўра, энг кўп балл жамғарган капитан Дилшод Тошпўлатов, сержантлар Абдулла Хакимов, Сиддиқ Аъзамов, Фарҳод Мусаев ва Аваз Ёқубов (техник назоратчи Икром Алимов) нуфузли мусобақада иштирок этиш йўлланмасини қўлга киритди.

Ғолиб ва совриндорларга Мудофаа вазирлигининг эсдалик совғалари топширилди.

Эслатиб ўтамиз, Ўзбекистон Мудофаа вазирлиги вакиллари Халқаро армия ўйинларининг 13 та турида иштирок этиши ҳақида маълумот берилган эди.