Оиласи нотинчлиги, иш йўқлиги ва бошқа сабаблар билан чекка вилоятлардан Тошкентга келиб мардикорлик қилаётган, бошпанаси йўқлиги туфайли бекатларда тунашга мажбур бўлаётган аёллар муаммосини «Mahalladosh.uz» нашри кўтариб чиқди. Мақолани тўлиғича келтириб ўтамиз.
«Роҳат кўли» яқинидаги бекатда бир аёл узала тушиб ётганига кўзимиз тушди. Бирон ёрдам керак деган ўйда бефарқ ўтиб кетолмадик. Яқинлашар эканмиз, спиртли ичимлик ичиб олгандир ёки тоби йўқдир деган фикрлар туғила бошланди. Барча гумонларни четга суриб, аёлни уйғотишга уриндик. Кўзини аранг очиб, бизга қарайди. Нега бу ерда ётганига қизиқдик. Аёл тўлиб турган эканми, дардини очиб сочди. Ўзининг айтишича, Наманган вилояти, Чуст тумани, «Қорақўрғон» маҳалласи, Беруний кўчасида яшаркан. Ўзини Зуҳра Матқулова деб таништирди.
— Эримнинг калтаклари, сўкишлари, хўрлашларидан Тошкентга қочиб келдим. Шу ерда ризқимни териб юрибман. Бу ерда мазза-да. Кунига 40-50 минг сўм топаман. Ўзим яшайдиган жойда иш топиш қийин? Иш топсангиз ҳам ойликлари ҳаминқадир. Чарчаб бекатда ухлаб қолипман.
Аёл 38 ёш экан. Лекин кўринишидан ёши анча катта бўлса керак деб ўйладик. Ҳаёт уни эрта қаритган. Сочлари оқариб кетган. Юзларига ажин оралаган. Қўллари оғир меҳнатдан қадоқ босганди. Кўзларидаги мунгни кўриб, ҳаётда қачон завқ-шавқ олган, турмушдан қачон рўшнолик кўрган экан деган саволлар ич-этимизни емира бошлади.
— Бу иккинчи турмушим, — дея гапиришда давом этди у. — Эрим мендан анча катта, 60 ёшда. Ҳеч жойда ёлчитиб ишламайди, мунтазам спиртли ичимлик ичади. Ичган пайтида мен билан жанжаллашиб, пичоқ тиқиб, бўйнимдан бўғишгача борган. Қўшнилар бир неча марта ажратган. Аммо, фойдаси бўлмади. Ўзимга ўхшаган мардикор аёллар билан шу яқин атрофда ижарада яшаяпман. Қорним очса, кўчадаги ошхоналарда овқатланаман. Уйда оилам бағрида ширин таомлар пишириб, оиламдагиларни хурсанд қилишни истардим. Қизимни жуда соғинганман. Нима қилаётган экан,— деганча водий йўлига тикилиб қолди.
Аёл жанжаллардан «эсдалик» бўлиб қолган тиртиқ ва чандиқларни кўрсатди.
Саволлар туғилади. Аёл яшайдиган маҳалла фуқаролар йиғини, туман хотин-қизлар қўмитаси қаерга қарамоқда? Нотинч оиланинг тақдири ҳеч кимни қизиқтирмадими? Яраштириш комиссияси нима билан банд бўлди экан? Аҳолининг бандлигини таъминлаш бўйича ислоҳотлар «Қорақўрғон» маҳалласига етиб бормади? Неча кундирки, аёл Тошкентда юрган бўлса, ҳеч ким қидирмадимикан? Фарзандини ташлаб, қаерга кетди деган саволни беришмадимикан?
Изоҳ (0)