Chirchiq garnizonida O‘zbekiston Mudofaa vazirligi Harbiy avtomobil nazorati (HAN) inspeksiyasi tomonidan joriy yilning avgust oyida o‘tkaziladigan Xalqaro armiya o‘yinlarining “Yo‘l patruli” musobaqasida ishtirok etuvchi jamoa puxta tayyorgarlik ko‘rmoqda. Bu haqda Mudofaa vazirligi matbuot xizmati “Daryo”ga xabar bermoqda.
Ta’kidlash kerakki, 2017-yilda o‘tkazilgan uchinchi Xalqaro armiya o‘yinlarining “Yo‘l patruli” tanlovida birinchi marta ishtirok etgan O‘zbekiston Mudofaa vazirligi HAN inspeksiyasi harbiy xizmatchilari uchinchi o‘rinni egallagan edi.
“Tayyorgarlik dasturi doirasida xayrli ishga qo‘l urildi. Ya’ni HAN inspeksiyasi tashabbusi bilan Chirchiq shahrida xizmat burchini bajarish vaqtida halok bo‘lgan harbiy xizmatchilarning yaqinlari holidan xabar olindi. Shundan so‘ng Mudofaa vazirligi HAN xodimlari bilan o‘quv yig‘ini tashkil etildi. Unda istiqboldagi rejalar, harbiy avtomobillarning xavfsiz harakatini ta’minlash choralari, bartaraf etilishi kerak bo‘lgan kamchiliklar hamda ArMI-2018 doirasida o‘tkaziladigan “Yo‘l patruli” xalqaro musobaqasiga tayyorgarlik ko‘rish jarayoni bilan bog‘liq bo‘lgan masalalar xususida vazifalar belgilandi”, — deyiladi xabarda.
Yig‘indan so‘ng “Chirchiq” poligonida “Yo‘l patruli” musobaqasi ishtirokchilari saralash sinovlaridan o‘tkazildi. Tanlov shartlariga ko‘ra, musobaqa qatnashchisi shaxsiy qurol va bronejilet kiyib, maxsus avtomobil yordamida 3700 metrdan iborat bo‘lgan xavfli burilish, qiyalik, ekstremal estakada va ishora ko‘rsatkichlari bilan ajratilgan yo‘lakdan harakatlandi (ikki marta o‘tiladi). U belgilangan hududda to‘xtab, turli usullarda nishonga qarata pistoletdan (ikkinchi marotaba avtomatdan) o‘q uzdi. Keyin temir yo‘l kesishmasidan o‘tib, bemorga birinchi tibbiy yordam ko‘rsatdi. Huddi shu tartibda yana harakatlanib, yuzaga kelgan yong‘inni bartaraf etdi. Jamoalarning uch nafar a’zosi mazkur masofani yakka tartibda bosib o‘tgan bo‘lsa, qolgan ikki nafari (ulardan biri jamoa sardori) avtomobilda texnik me’yorlarni bajardi.
Tanlovning yakuniy natijalariga ko‘ra, eng ko‘p ball jamg‘argan kapitan Dilshod Toshpo‘latov, serjantlar Abdulla Xakimov, Siddiq A’zamov, Farhod Musayev va Avaz Yoqubov (texnik nazoratchi Ikrom Alimov) nufuzli musobaqada ishtirok etish yo‘llanmasini qo‘lga kiritdi.
G‘olib va sovrindorlarga Mudofaa vazirligining esdalik sovg‘alari topshirildi.
Eslatib o‘tamiz, O‘zbekiston Mudofaa vazirligi vakillari Xalqaro armiya o‘yinlarining 13 ta turida ishtirok etishi haqida ma’lumot berilgan edi.
Izoh (0)