Таиланд қироли Маха Вачиралонгкон қироллик оиласининг миллиардлаб долларга баҳоланган бутун бойлигини ўз ихтиёрига олади, бироқ у мазкур маблағдан солиқ тўлашига тўғри келади. Бу ҳақда «Интерфакс» хабар берди.
Хабар берилишича, Таиланд ҳукумати мамлакатда 1936 йилдан бери амалда бўлган қонунни бекор қилган. Қонунга кўра, қироллик бойлиги турли тоифадаги активларга бўлинган ва алоҳида бошқарилган. Энди қирол барча маблағларнинг ягона эгаси бўлади.
Аввал қироллик активларини бошқарган Crown Property Bureau компанияси қиролнинг шахсий ҳисоб рақамига Siam Cement Public Company ва Siam Commercial Bank Public Company компанияларининг етти миллиард доллардан ортиқ акциясини ўтказган.
Таъкидланишича, бу маблағ Таиланднинг ихтиёрий фуқароларига тегишли акциялар каби солиққа тортилади.
Қироллик бойлигининг умумий миқдори номаълум, бироқ, Forbes маълумотларига кўра, у 2012 йилда 30 миллиард долларни ташкил қилган. Агар бу сумма тўғри бўлса, Таиланд монархи дунёдаги энг бой қироллик оилаларидан бири бўлади.
Маха Вачиралонгкон 2016 йил декабрь ойида Таиланд қироли бўлган. У мамлакатни 1782 йилдан буён бошқараётган Чакри сулоласининг ўнинчи вакили ҳисобланади.
Изоҳ (0)