Қозоғистонда овоз кучайтиргич орқали чақириладиган азонинг шовқинини 70 децибелдан оширмаслик сўралди, деб хабар беради «Azon.uz».
«Азон мусулмон анъаналарининг айрилмас қисмидир. Бироқ сўнгги пайтларда Қозоғистон Республикаси дин ишлари ва фуқаролик жамияти вазирлигига масжидларда азон овозининг белгиланиши бўйича кўплаб мурожаатлар келиб тушди», – дейилади хабарда.
Шу муносабат билан вазирлик Қозоғистон мусулмонлар идораси ҳамда Остона ва Алмати шаҳарлари дин ишлари бошқармалари билан ҳамкорликда азон овозининг санитария-эпидемиология талабларига мос бўлиши кераклиги ҳақида тушунтириш ишларини олиб борди.
Қоидага кўра, соат 07:00 дан 23:00 гача хонадонларга кирадиган шовқин 55 дан 70 dBА (децибел)гача, соат 23:00 дан 07:00 гача 45 дан 60 dBАгача бўлиши керак.
Вазирлик масжидлар раҳбарларидан санитария-эпидемиология талабларига риоя этишни, фуқаролардан эса амалдаги қонунчиликка зид бўлмаган тақдирда диний маросимларга тушуниш билан ёндашишларини сўради.
Изоҳ (0)